ചെന്നൈ : ബിജെപി തമിഴ്നാട് ഘടകം അദ്ധ്യക്ഷൻ കെ അണ്ണാമലൈ നയിക്കുന്ന ‘എൻ മണ്ണ് എൻ മക്കൾ’ പദയാത്രയുടെ രണ്ടാം ഘട്ടം തെങ്കാശി ജില്ലയിലെ ആലാംകുളത്തു നിന്ന് ഇന്നലെ ആരംഭിച്ചു. .ജില്ലയിലെ തെങ്കാശി, കടയനല്ലൂർ, വാസുദേവനല്ലൂർ നഗരങ്ങളിലൂടെയും ഇത് കടന്നുപോകും. സെപ്റ്റംബർ ആറിന് വിരുദുനഗർ ജില്ലയിലെ രാജപാളയം, ശ്രീവില്ലിപുത്തൂർ എന്നിവിടങ്ങളിലൂടെ പദയാത്ര കടന്നുപോകും. പദയാത്രയുടെ ആദ്യഘട്ടത്തിൽ വിരുദുനഗർ ജില്ലയുടെ ഒരു ഭാഗം കവർ ചെയ്തിരുന്നു.
ജൂലൈ 28 ന് കേന്ദ്ര ആഭ്യന്തര മന്ത്രി അമിത് ഷാ രാമേശ്വരത്ത് ഫ്ലാഗ് ഓഫ് ചെയ്ത യാത്രയുടെ ആദ്യ ഘട്ടം ഓഗസ്റ്റ് 22 ന് തിരുനെൽവേലിയിൽ സമാപിച്ചിരുന്നു.. ആദ്യ ഘട്ടത്തിൽ ശ്രീ അണ്ണാമലൈ രാമനാഥപുരം, ശിവഗംഗ, പുതുക്കോട്ടൈ, മധുരൈ, വിരുദുനഗർ, തൂത്തുക്കുടി, കന്യാകുമാരി, തിരുനെൽവേലി എന്നീ ദക്ഷിണ ജില്ലകളിലെ 41 നിയമസഭാ മണ്ഡലങ്ങളിൽ സഞ്ചരിച്ചു.
യാത്രയുടെ രണ്ടാം ഘട്ടം തെങ്കാശി ജില്ലയിലെ ആലാംകുളത്ത് നിന്ന് ആരംഭിച്ച് സെപ്റ്റംബർ 28 ന് കോയമ്പത്തൂർ ജില്ലയിലെ മേട്ടുപാളയത്ത് സമാപിക്കും. 25 ദിവസം നീണ്ടുനിൽക്കുന്ന യാത്രയിൽ ആറ് ദിവസത്തെ ഇടവേളയുണ്ടാകുമെന്ന് സംഘാടകർ അറിയിച്ചിട്ടുണ്ട്.
തെങ്കാശി ജില്ലയിലെ കർഷകർ നൽകിയ കലപ്പയുമേന്തിയാണ് കെ അണ്ണാമലൈ തന്റെ രണ്ടാം ഘട്ട പര്യടനം ആരംഭിച്ചത്.
