ന്യൂഡൽഹി: ദേശീയ അദ്ധ്യാപകദിനത്തിൽ രാഷ്ട്രപതി ഭവനിലെ ഡോ. എസ് രാധാകൃഷ്ണന്റെ ഛായചിത്രത്തിൽ പുഷ്പാർച്ചന നടത്തി രാഷ്ട്പതി ദ്രൗപദി മുർമു. മുൻ രാഷ്ട്രപതിയുടെ ജന്മദിനമായ ഇന്നാണ് അദ്ധ്യാപക ദിനമായി രാജ്യം ആചരിക്കുന്നത്.
അദ്ധ്യാപകദിനത്തോടനുബന്ധിച്ച് രാഷ്ട്രപതി ദ്രൗപദി മുർമു ഇന്ന് ദേശീയ അദ്ധ്യാപക പുരസ്കാരങ്ങൾ വിതരണം ചെയ്തു. തിരഞ്ഞെടുക്കപ്പെട്ട 75 അദ്ധ്യാപകർക്കാണ് രാഷ്ട്രപതി പുരസ്കാരങ്ങൾ കൈമാറിയത്. സർട്ടിഫിക്കറ്റും 50,000 രൂപ ക്യാഷ് അവാർഡും വെള്ളി മെഡലും അടങ്ങുന്നതാണ് അവാർഡ്. കഴിഞ്ഞ ദിവസം പുരസ്കാരത്തിന് അർഹരായ അദ്ധ്യാപകരുമായി പ്രധാനമന്ത്രി നരേന്ദ്രമോദി സംവദിച്ചിരുന്നു.
1888 സെപ്തംബർ 5-ന് മദ്രാസിലെ ഒരു ചെറിയ ഗ്രാമത്തിൽ ജനിച്ച സർവേപ്പള്ളി രാധാകൃഷ്ണൻ തത്ത്വചിന്തകനും പ്രശസ്ത അദ്ധ്യാപകനുമായിരുന്നു. 1952-ൽ ഇന്ത്യയുടെ ആദ്യത്തെ ഉപരാഷ്ട്രപതിയും 1962 മുതൽ 1967 വരെ രാജ്യത്തെ രണ്ടാമത്തെ രാഷ്ട്രപതിയുമായി അദ്ദേഹം സേവനമനുഷ്ഠിച്ചു. അദ്ധ്യാപകൻ, രാഷ്ട്രപതി എന്നതിലുപരി ഒരു എഴുത്തുകാരനായും അദ്ദേഹം പ്രവർത്തിച്ചു. രവീന്ദ്രനാഥ ടാഗോറിന്റെ തത്ത്വചിന്ത, ഇന്ത്യൻ തത്ത്വചിന്ത, സത്യം തിരയുക, ശാസ്ത്രം, സംസ്കാരം എന്നീ കൃതികൾ ഉൾപ്പെടെ നിരവധി പുസ്തകങ്ങൾ അദ്ദേഹം രചിച്ചിട്ടുണ്ട്.
