മലയാള സിനിമയിൽ അഭിനയിക്കാൻ വളരെ അധികം ഇഷ്ടമാണെന്ന് ബോളിവുഡ് നടൻ ആയുഷ്മാൻ ഖുറാന. നടൻ ഫഹദ് ഫാസിലിന്റെ വലിയ ആരാധകനാണ് താനെന്നും അദ്ദേഹം പറഞ്ഞു. നല്ല അവസരങ്ങൾ ലഭിക്കുകയാണെങ്കിൽ അയാളോടൊപ്പം അഭിനയിക്കുകയും ചെയ്യുമെന്ന് നടൻ ആയുഷ്മാൻ ഖുറാന പറഞ്ഞു. പുതിയ ചിത്രമായ ഡ്രീം ഗേൾ 2 വിന്റെ പ്രമോഷനുമായി ബന്ധപ്പെട്ട് ഒരു അഭിമുഖത്തിൽ സംസാരിക്കുകയായിരുന്നു അദ്ദേഹം.
‘തെന്നിന്ത്യൻ സിനിമയിൽ അഭിനയിക്കാൻ ആഗ്രഹമുണ്ട്. പ്രത്യേകിച്ച് മലയാള സിനിമയിൽ. അതിനുള്ള കാരണം മലയാള സിനിമ വളരെ ലളിതമാണ്. നമ്മുടെ ഒപ്പം ചേർന്ന് നിൽക്കാൻ കഴിയുന്നത്. അതെന്നും വേരുറച്ച് നിൽക്കുന്നതാണ്. ഞാൻ ഫഹദ് ഫാസിലിന്റെ വലിയ ആരാധകനാണ്. നല്ലൊരു അവസരം ലഭിക്കുകയാണെങ്കിൽ ഫഹദിനൊപ്പം അഭിനയിക്കും. കാരണം അദ്ദേഹത്തിന്റെ സിനിമകളെല്ലാം എന്റെ ഹൃദയത്തിൽ ഇടം പിടിച്ചു കഴിഞ്ഞു. ഫഹദിന്റെ കുമ്പളങ്ങി നൈറ്റ്സ് പോലെയുള്ള ചിത്രങ്ങൾ വലിയ ഇഷ്ടമാണ്. സിനിമയുടെ സൗണ്ട് ട്രാക്ക് എനിക്കിഷ്ടമാണ്.’- ആയുഷ്മാൻ ഖുറാന പറഞ്ഞു.
2019ൽ പുറത്തിറങ്ങിയ ഡ്രീം ഗേൾ എന്ന സിനിമയുടെ രണ്ടാംഭാഗമാണ് ഡ്രീം ഗേൾ 2. രാജ് ശാന്ദില്യ സംവിധാനം ചെയ്യുന്ന ചിത്രത്തിൽ അനന്യ പാണ്ഡെയാണ് നായിക. പരേഷ് റാവൽ, അന്നു കപൂർ, രാജ്പാൽ യാദവ്, വിജയ് റാസ് എന്നിവരാണ് ചിത്രത്തിൽ മറ്റുകഥാപാത്രങ്ങളെ അവതരിപ്പിച്ചത്. ചിത്രത്തിൽ സ്ത്രീ ഗെറ്റപ്പിൽ ആയുഷ്മാൻ എത്തുന്നുണ്ട്. ഏക്ത കപൂർ–ശോഭ കപൂർ എന്നിവര് ചേർന്നാണ് സിനിമയുടെ നിർമ്മാണം.
