മെഗാസ്റ്റാർ മമ്മൂട്ടി നായകനായി എത്തുന്ന ‘കണ്ണൂർ സ്‌ക്വാഡി’ന്റെ ട്രെയിലർ റിലീസ് ചെയ്ത് മണിക്കൂറുകൾ പിന്നിടുമ്പോൾ യൂട്യൂബ് ട്രൻഡിംഗിൽ ഒന്നാം സ്ഥാനത്തിൽ നിലനിൽക്കുന്നു. 1.4 മില്യണിൽ അധികം കാഴ്ചക്കാരെയും 73k-യിലധികം ലൈക്‌സും നേടിയാണ് ഈ ഇൻവെസ്റ്റിഗേഷൻ ചലച്ചിത്രത്തിന്റെ ട്രെയിലർ സമൂഹ മാദ്ധ്യമങ്ങളിൽ ജൈത്രയാത്ര തുടരുന്നത്.
നൽപകൽ നേരത്തു മയക്കം, റോഷാക്ക് തുടങ്ങി ഹിറ്റ് സിനിമകൾക്ക് ശേഷം മമ്മൂട്ടി കമ്പനി നിർമ്മിക്കുന്ന ചിത്രമാണ് കണ്ണൂർ സ്‌ക്വാഡ്. ചിത്രത്തിൽ പോലീസ് ഉദ്യോഗസ്ഥനായാണ് മമ്മൂട്ടി സ്‌ക്രീനിൽ പ്രത്യക്ഷപ്പെടുന്നത്. ത്രില്ലർ ഇൻവെസ്റ്റിഗേഷൻ കഥയായ കണ്ണൂർ സ്‌ക്വാഡിന്റെ സംവിധാനം നിർവ്വഹിച്ചിരിക്കുന്നത് റോബി വർഗീസ് രാജാണ്. ദുൽഖർ സൽമാന്റെ ഉടമസ്ഥയിലുള്ള വേഫെറർ ഫിലിംസാണ് ചിത്രം വിതരണം ചെയ്യുന്നത്. ചിത്രത്തിന്റെ കഥ ഒരുക്കിയിരിക്കുന്നത് ഷാഫിയാണ്. സംഗീത സംവിധായകൻ സുഷിൻ ശ്യാമാണ് ചിത്രത്തിനായി ഗാനങ്ങൾ ഒരുക്കിയിരിക്കുന്നത്.
മമ്മൂട്ടിയ്‌ക്കു പുറമെ വിജയരാഘവൻ, സണ്ണിവെയ്ൻ, കിഷോർ, അസീസ് നെടുമങ്ങാട്, തുടങ്ങിയവരും ചിത്രത്തിൽ പ്രധാന കഥാപാത്രങ്ങളെ അവതരിപ്പിക്കുന്നു. മമ്മൂട്ടിയുടെ 72-ാം ജന്മദിനത്തിലാണ് ആരാധകർക്ക് സ്‌നേഹസമ്മാനമായി ചിത്രത്തിന്റെ ട്രെയിലർ പുറത്തു വിട്ടത്. കുറ്റന്വേഷണ കഥയായ ഈ ചിത്രം ആരാധകർക്ക് മികച്ച അനുഭവം നൽകുമെന്നാണ് വിലയിരുത്തൽ.
