അടുത്തിടെയാണ് ഡിജിറ്റൽ രംഗത്ത് വമ്പൻ മാറ്റങ്ങളുമായി പേടിഎം കാർഡ് സൗണ്ട് ബോക്‌സ് അവതരിപ്പിച്ചത്. ടാപ് ആന്റ് പേ സംവിധാനത്തിൽ പ്രവർത്തിക്കുന്ന സൗണ്ട് ബോക്‌സ് വിസ,മാസ്റ്റർ കാർഡ്, അമേരിക്കൻ എക്‌സ്പ്രസ്, റുപേ എന്നിങ്ങനെയുള്ള എല്ലാ നെറ്റ്വർക്കിലൂടെയും വ്യാപാരികൾക്ക് പേയ്‌മെന്റുകൾ സ്വീകരിക്കാനാകും. കാർഡിനായി പ്രത്യേകം മെഷീൻ സ്ഥാപിക്കേണ്ട ആവശ്യമില്ലാതെ വ്യാപാരികൾക്ക് സേവനങ്ങൾ ലളിതമാക്കാനാണ് പുതിയ സംവിധാനം.
കാർഡ് പേയ്‌മെന്റുകൾ സ്വീകരിക്കുന്നതിനോടൊപ്പം എല്ലാ പേയ്‌മെന്റുകളും പ്രാദേശിക ഭാഷകളിലും ശബ്ദ അറിയിപ്പ് ലഭിക്കും. യുപിഐ അക്കൗണ്ട് വഴി പണം ലഭിച്ചാൽ അത് വിളിച്ചറിയ്‌ക്കുകയാണ് സൗണ്ട് ബോക്‌സ് ചെയ്യുന്നത്. ഇത്തരത്തിലുള്ള സംവിധാനം കഴിഞ്ഞ വർഷമാണ് പേടിഎം പുറത്തിറക്കിയത്. എന്നാൽ പുതിയ മാറ്റത്തിൽ ശബ്ദം വിളിച്ചറിയിക്കുക അമിതാഭ് ബച്ചനാകും.അമിതാഭ് ബച്ചന്റെ സ്വരം നൽകിയിരിക്കുകയാണ് കമ്പനി. 5,000 രൂപ വരെയുള്ള കാർഡ് പേയ്‌മെന്റുകളാണ് വ്യാപാരികൾക്ക് ഇതിലൂടെ സ്വീകരിക്കാൻ കഴിയുന്നത്.
രാജ്യത്തെ ചെറുകിട വ്യാപാരങ്ങളെ നവീകരിക്കുന്നതിലും സാമ്പത്തിക ഇടപാടുകൾ ലളിതമാക്കുന്നതിനും പേടിഎം ഏറെ ശ്രദ്ധിക്കുന്നുണ്ടെന്ന് പേടിഎം സഹസ്ഥാപകൻ വിജയ് ശേഖർ ശർമ വ്യക്തമാക്കി. ലളിതമായ പണമിടപാടുകൾ ലഭ്യമാകുന്നതിന്റെ അടുത്ത പടിയാണ് പേടിഎം കാർഡ് സൗണ്ട് ബോക്സെന്നും അദ്ദേഹം പറഞ്ഞു. ഈ സംവിധാനം രാജ്യത്ത് ആദ്യമായാണ് അവതരിപ്പിക്കുന്നതെന്ന് നാഷണൽ പേയ്മെന്റ് കോർപ്പറേഷൻ അറിയിച്ചു.
