ന്യൂഡൽഹി: ജി20 ഉച്ചകോടിക്കായി രാജ്യ തലസ്ഥാനം ഒരുങ്ങികഴിഞ്ഞിരിക്കുകയാണ്. സെപ്തംബർ 9,10 തിയതികളിലാണ് ജി 20 ഉച്ചകോടി നടക്കുന്നത്. ജി 20 ഉച്ചകോടിയിൽ പങ്കെടുക്കാൻ ഇന്റർനാഷണൽ മോണിറ്ററി ഫണ്ട് (ഐഎംഎഫ്) മാനേജിംഗ് ഡയറക്ടർ ക്രിസ്റ്റലീന ജോർജീവ ഇന്ന് ഡൽഹിയിലെത്തി. ന്യൂഡൽഹി വിമാനത്താവളത്തിലെത്തിയ ക്രിസ്റ്റലീന ജോർജീവയെ ഒഡീഷയിലെ പ്രശസ്തമായ സംബൽപുരി നാടൻ പാട്ടുകളുടെ ഈണങ്ങളോടെയാണ് സ്വീകരിച്ചത്.
സംബൽപുരി ഗാനത്തിന്റെ ഈണവും നര്‍ത്തകികളുടെ നൃത്തവും കണ്ടപ്പോഴുള്ള ജോർജീവയുടെ സന്തോഷവും നൃത്തം ചെയ്യാനുള്ള ആവേശവുമൊക്കെയാണ് ഇപ്പോൾ സമൂഹമാദ്ധ്യമങ്ങളിൽ വെെറലാകുന്നത്. ഒഡിയയുടെ സംസ്‌കാരത്തിൽ അഭിമാനം പ്രകടിപ്പിച്ച് കേന്ദ്രമന്ത്രി ധർമേന്ദ്ര പ്രധാനാണ് എക്‌സിൽ പരിപാടിയുടെ വീഡിയോ പങ്കുവെച്ചത്. സംബൽപുരി ഗാനത്തിലും നൃത്തത്തിലും ആകർഷ്ടയായ ജോർജീവ സംബൽപുരി കലാകാരികൾക്കൊപ്പം മതിമറന്ന് സ്വയം നൃത്തം ചെയുകയും അവരോട് കെെകൾകൂപ്പി നന്ദി പറയുകയും ചെയ്യുന്നതാണ് വീ‍ഡിയോയിലെ കൗതുക കാഴ്ച.
ദക്ഷിണേഷ്യയിലെ ആദ്യത്തെ ജി20 ഉച്ചകോടിക്കാണ് ഡൽഹിയിലെ പ്രഗതി മൈതാനം സാക്ഷ്യം വഹിക്കുന്നത്. ഇന്റർനാഷണൽ എക്‌സിബിഷൻ-കൺവെൻവെൻഷൻ സെന്ററിലാണ് ഉച്ചകോടി നടക്കുന്നത്. ജി20 ഉച്ചകോടിയോടനുബന്ധിച്ച് ഡൽഹിയിലെ പ്രഗതി മൈതാനത്ത് സ്ഥാപിച്ച നടരാജ വിഗ്രഹം ഇതിനോടകം ലോകശ്രദ്ധ പിടിച്ചുപ്പറ്റി. ആദ്യമായാണ് ജി20 ഉച്ചക്കോടിയ്‌ക്ക് ഇന്ത്യ ആതിഥേയത്വം വഹിക്കുന്നത്. 20 അംഗരാജ്യങ്ങളടക്കം 40 രാജ്യങ്ങളിൽ നിന്നുള്ള നേതാക്കൾ പങ്കെടുക്കും. 15 ഉഭയകക്ഷി ചർച്ചകളാണ് വിവിധ രാഷ്‌ട്രതലവന്മാരുമായി ഇന്ത്യൻ പ്രധാനമന്ത്രി നരേന്ദ്ര മോദി നടത്തുന്നത്.
