കോഴിക്കോട്: ജി20 ഉച്ചകോടി ഗംഭീരമായി ആസൂത്രണം ചെയ്തതിൽ പ്രധാനമന്ത്രി നരേന്ദ്രമോദിയെയും കേന്ദ്ര സർക്കാരിനെയും പ്രശംസിച്ച് കാന്തപുരം എ.പി അബൂബക്കർ മുസ്‌ലിയാർ. ഇന്ത്യയെ ലോകമെമ്പാടുമുള്ള രാജ്യങ്ങൾ പ്രശംസിക്കുകയാണ്. യുദ്ധം മൂലമുണ്ടാകുന്ന സംഘർഷങ്ങൾ പരിഹരിക്കാൻ പ്രധാനമന്ത്രി നടത്തിയ ആഹ്വാനം ആഗോള സമാധാനത്തിനും ഐക്യത്തിനും പ്രത്യാശ പകരുന്നുവെന്നും ഇന്ത്യയുടെ ആഗോള പ്രാധാന്യം എടുത്ത് കാണിക്കുന്നതാണ് ജി20 ഉച്ചകോടിയെന്നും അദ്ദേഹം പറഞ്ഞു.
‘ഒരു ഭൂമി, ഒരു കുടുംബം, ഒരു ഭാവി എന്ന പ്രമേയവുമായി ഡൽഹിയിൽ നടക്കുന്ന ജി 20 ഉച്ചകോടി ഇന്ത്യയുടെ ആഗോള പ്രാധാന്യത്തെ ഉയർത്തിക്കാട്ടുന്ന ഒരു സുപ്രധാന സംഭവമാണ്. ഈ ഉച്ചകോടിക്ക് ആതിഥേയത്വം വഹിക്കാനുള്ള ഇന്ത്യയുടെ അവസരം ലോകമെമ്പാടുമുള്ള രാജ്യങ്ങൾ പരക്കെ പ്രശംസിക്കുന്നു. കാലാവസ്ഥാ വ്യതിയാനം, ആഗോളതാപനം, സാമ്പത്തിക പുരോഗതി, പണപ്പെരുപ്പം തുടങ്ങിയ നിർണായക വിഷയങ്ങളെ ചർച്ചകളിലൂടെ ഉച്ചകോടി അഭിസംബോധന ചെയ്യുന്നത് പ്രശംസനീയമാണ്’.
‘ഉദ്ഘാടന സമ്മേളനത്തിൽ, യുദ്ധം മൂലമുണ്ടാകുന്ന സംഘർഷങ്ങൾ പരിഹരിക്കാനുള്ള ബഹുമാനപ്പെട്ട പ്രധാനമന്ത്രിയുടെ ആഹ്വാനം ആഗോള സമാധാനത്തിനും ഐക്യത്തിനും പ്രത്യാശ പകരുന്നു. തീവ്രവാദം, സൈബർ സുരക്ഷ തുടങ്ങിയ വെല്ലുവിളികളെ അഭിമുഖീകരിക്കുന്നതിൽ നല്ല ചുവടുവെപ്പാണ് ഉച്ചകോടിയിലുണ്ടായത്. 60 നഗരങ്ങളിലായി 220 കോ-ഇവന്റുകളുടെ അകമ്പടിയോടെ നടക്കുന്ന ദ്വിദിന ജി20 ഉച്ചകോടി കേന്ദ്ര സർക്കാരിന്റെയും ഉദ്യോഗസ്ഥരുടെയും സൂക്ഷ്മമായ ആസൂത്രണവും നിർവ്വഹണവും പ്രതിഫലിപ്പിക്കുന്നു. ജി20 ഉച്ചകോടിയുടെ വിജയത്തിന് അഭിനന്ദനങ്ങളും ആശംസകളും’- എ.പി അബൂബക്കർ മുസ്‌ലിയാർ പറഞ്ഞു.
