ന്യൂഡൽഹി: ഏഷ്യൻ ഗെയിംസിലെ ഇന്ത്യൻ ടീമിന്റെ പുതിയ പരിശീലകരെ പ്രഖ്യാപിച്ചു. ടി20 ഫോർമാറ്റിൽ നടക്കുന്ന ടൂർണമെന്റിൽ ഇന്ത്യയുടെ പുരുഷ, വനിതാ ടീമുകളെ ഇതിഹാസ ബാറ്ററും ദേശീയ ക്രിക്കറ്റ് അക്കാദമി (എൻസിഎ) തലവനുമായ വിവിഎസ് ലക്ഷ്മൺ, മുൻ ഇന്ത്യൻ താരം ഋഷികേശ് കനിത്കർ എന്നിവരാണ് പരിശീലിപ്പിക്കുക. ഇരുവരെയും ബിസിസിഐയാണ് പരിശീലകരായി പ്രഖ്യാപിച്ചത്.
പുരുഷ ടീമിനെ പരിശീലിപ്പിച്ച് പരിചയ സമ്പത്തുളള വ്യക്തിയാണ് വിവിഎസ് ലക്ഷ്മൺ. രാഹുൽ ദ്രാവിഡിന് വിശ്രമം അനുവദിച്ച ഘട്ടത്തിലാണ് ലക്ഷ്മൺ ടീമിന്റെ താത്കാലിക കോച്ചായത്. വനിതാ ടീമിന്റെ പരിശീലക സംഘത്തിൽ നേരത്തെയും ഋഷികേശ് കനിത്കർ ഉൾപ്പെട്ടിട്ടുണ്ട്. ത്രിരാഷ്ട്ര ടി20 പരമ്പര, വനിതാ ടി20 ലോകകപ്പ് മത്സരങ്ങളിലാണ് കനിക്തർ ഇന്ത്യൻ ടീമിനെപരിശീലിപ്പിച്ചത്.
ഏഷ്യൻ ഗെയിംസിൽ ഋതുരാജ് ഗെയ്ക്വാദ് ക്യാപ്റ്റനായ രണ്ടാം നിര ടീമാണ് ഇന്ത്യയ്ക്കായി പുരുഷ വിഭാഗത്തിൽ കളത്തിലിറങ്ങുക. വനിതാ വിഭാഗത്തിൽ മുതിർന്ന താരങ്ങളുൾപ്പെടയുള്ളവർ തന്നെയാണ് കളിക്കുന്നത്. പുരുഷ ടീമിൽ സയ്രാജ് ബഹുതുലെ ബൗളിങ് കോച്ചും മുനിഷ് ബാലി ഫീൽഡിംഗ് പരിശീലകനുമാകും. വനിതാ ടീമിൽ രജിബ് ദത്ത ബൗളിങ് കോച്ചും ശുഭദീപ് ഘോഷ് ഫീൽഡിങ് പരിശീലകനുമായിരിക്കും.
