ബഹിരാകാശത്തെക്കുറിച്ചും അവിടുത്തെ വിശേഷങ്ങളെക്കുറിച്ചും പറഞ്ഞു തീരാതെ യുഎഇ ബഹിരാകാശ സഞ്ചാരി സുൽത്താൻ അൽ നിയാദി. ആറ് മാസത്തെ നീണ്ട ബഹിരാകാശ ദൗത്യത്തിന് ശേഷം കഴിഞ്ഞ ദിവസമാണ് അദ്ദേഹം ഭൂമിയിലേക്ക് തിരികെ എത്തിയത്. ഭൂമിയിൽ തിരികെ എത്തിയതിൽ വളരെയധികം സന്തോഷമുണ്ടെന്നും ബഹിരാകാശ ജീവിതം ഏറെ മിസ് ചെയ്യുന്നുണ്ടെന്നും അദ്ദേഹം പറഞ്ഞു. മാംഗോ സാലഡ് കഴിച്ചത് മുതൽ ഭൂമിയുടെ ചിത്രങ്ങൾ എടുത്തത് വരെയുള്ള ബഹിരാകാശ ദൗത്യങ്ങൾക്കിടയിലെ സന്തോഷങ്ങൾ അദ്ദേഹം വിവരിച്ചു.
ടെക്സസിലെ ഹൂസ്റ്റണിൽ നിന്ന് യുഎസ് ബഹിരാകാശ ഏജൻസിയായ നാസ നടത്തിയ പരിപാടിയിൽ പങ്കെടുക്കവെയാണ് സുൽത്താൻ അൽ നിയാദി തന്റെ അനുഭവങ്ങൾ പങ്കുവെച്ചത്. സെപ്റ്റംബർ നാലിന് ഭൂമിയിലെത്തിയ സംഘം ഇവിടുത്തെ ഗുരുത്വാകർഷണവുമായി പൊരുത്തപ്പെടുന്നതിനുള്ള റിക്കവറി പരിപാടികളിൽ പങ്കെടുത്തുകൊണ്ടിരിക്കുകയാണ്. ബഹിരാകാശ നിലയത്തിലിൽ കഴിയവെ കഴിച്ചതിൽ ഏറ്റവും ഇഷ്ടപ്പെട്ട ഭക്ഷണം മാംഗോ സാലഡ് ആണെന്ന് സുൽത്താൻ അൽ നിയാദി വ്യക്തമാക്കി. ദൗത്യത്തിൽ ഉടനീളം മടുക്കാതെ കഴിച്ചതും ഇതായിരുന്നുവെന്ന് അദ്ദേഹം പറഞ്ഞു.
ബഹിരാകാശ ദൗത്യത്തിനിടയിലെ വിശ്രമവേളകളിൽ സംഘം ചെസ് കളിച്ചായിരുന്നു ചിലവഴിച്ചത്. സാവകാശം ദിവസങ്ങളെടുത്താണ് ഗെയിം പൂർത്തിയാക്കിയത്. ഇരുന്നൂറിലേറെ പരീക്ഷണങ്ങളാണ്് ആറ് മാസത്തിനുള്ളിൽ സംഘം പൂർത്തിയാക്കിയത്. ഇതിനൊപ്പം തന്നെ ബഹിരാകാശ നിലയത്തിൽ ഒട്ടേറെ അറ്റകുറ്റപ്പണികളും നടത്തി. ഏഴ് മണിക്കൂറും ഒരു മിനിറ്റും നിയാദി സ്പേസ് വോക്ക് നടത്തിയിരുന്നു. അധികം വൈകാതെ വലിയ നേട്ടങ്ങൾ കൈവരിച്ചതിലുള്ള ആഘോഷങ്ങളുടെ ഭാഗമായി യുഎഇയിൽ നിയാദി എത്തും.
Comments