ഭോപ്പാൽ: ഇന്ത്യൻ ഗുസ്തി താരം സൗരവ് ഗുർജാർ മദ്ധ്യപ്രദേശിലെ ഉജ്ജയിനി മഹാകാലേശ്വർ ക്ഷേത്രത്തിൽ ദർശനം നടത്തി. ക്ഷേത്രത്തിൽ ദർശനം നടത്തിയ സൗരവ് പ്രത്യേക പൂജകളിൽ പങ്കെടുക്കുകയും ഭസ്മ ആരതി ചടങ്ങ് നടത്തുകയും ചെയ്തു. ക്ഷേത്രദർശനത്തിന് ശേഷം പൂജാചടങ്ങുകളിൽ പങ്കെടുത്തതിന്റെ അനുഭവങ്ങൾ അദ്ദേഹം മാദ്ധ്യമപ്രവർത്തകരോട് പങ്കുവെച്ചു.
‘മഹാകലേശ്വർ ക്ഷേത്രത്തിലെത്തി ബാബ മഹാകാലിനെ ആരാധിക്കാൻ സാധിച്ചതിൽ അതിയായ സന്തോഷമാണുള്ളത്. ക്ഷേത്രത്തിലെ പൂജ അതിശയകരമായ ഒരു അനുഭൂതിയാണ് നൽകിയത്. ആ വികാരം വിശദീകരിക്കാൻ എനിക്ക് വാക്കുകളില്ല. വരാനിരിക്കുന്ന കാലങ്ങളിൽ ലോകം മുഴുവൻ സനാതന ധർമ്മത്തെ വിശ്വസിക്കുകയും കൂടുതൽ ശക്തമാക്കുകയും ചെയ്യും. രാജ്യം മുഴുവൻ സന്തോഷവും സമാധാനവും സമൃദ്ധിയും നിലനിർത്തണം എന്നാണ് ഞാൻ ആഗ്രഹിക്കുന്നത്. വീണ്ടും ദർശനം നടത്താൻ ഭാഗ്യമുണ്ടാകുമെന്ന് വിശ്വസിക്കുന്നു’സൗരവ് ഗുർജാർ പറഞ്ഞു.
ക്ഷേത്രത്തിലെ പ്രസിദ്ധമായ ചടങ്ങാണ് ഭസ്മ ആരതി. പുലർച്ചെ മൂന്ന് മണിയ്ക്കും 5.30 നും ഇടയിലുള്ള ബ്രഹ്മ മുഹൂർത്തത്തിലാണ് ഇത് നടത്തുന്നത്. ബാബ മഹാകാലിന് ജലാഭിഷേകവും പഞ്ചാമൃത മഹാഭിഷേകും നടത്തും. പാൽ, തൈര്, നെയ്യ്, തേൻ, പഴച്ചാറുകൾ എന്നിവകൊണ്ട് അഭിഷേകം ചെയ്യും. തുടർന്ന് താളമേളങ്ങൾക്കും ശംഖ് നാദത്തിനുമിടയിലാണ് ഭസ്മ ആരതി നടത്തുന്നത്.
