പ്രായ പൂർത്തിയാകാത്ത പെൺകുട്ടിക്കൊപ്പമുളള ലൈംഗിക വീഡിയോ പ്രചരിപ്പിച്ചതിന് റയൽ മാഡ്രിഡ് താരങ്ങൾ അറസ്റ്റിൽ. 21, 22 വയസ്സുളള മൂന്ന് താരങ്ങളെയാണ് സ്പാനിഷ് പോലീസ് അറസ്റ്റ് ചെയ്തത്. എന്നാൽ താരങ്ങളുടെ പേര് പോലീസ് വെളിപ്പെടുത്തിയിട്ടില്ല. റയലിന്റെ മറ്റൊരു താരവും പോലീസിന്റെ നിരീക്ഷണത്തിലാണ്.
റയൽ മാഡ്രിഡ് യൂത്ത് അക്കാദമിയിലെ താരങ്ങൾക്കെതിരെ കഴിഞ്ഞ മാസമാണ് പെൺക്കുട്ടിയുടെ മാതാവ് പരാതി നൽകിയത്. താരങ്ങളുടെ ഫോൺ പരിശോധിച്ച പോലീസ് ചോദ്യം ചെയ്യലിന് ശേഷം ഇവരെ വിട്ടയച്ചു. സംഭവത്തിൽ പ്രതികരിച്ച് റയൽ മാഡ്രിഡ് ക്ലബ് രംഗത്തെത്തി. റയലിന്റെ രണ്ടാം ടീമായ കാസ്റ്റില്ലയിലെ ഒരു താരത്തിനെതിരെയും മൂന്നാം ടീമായ റയൽ മാഡ്രിഡ് സിയുടെ മൂന്ന് താരങ്ങൾക്കെതിരെയും പരാതി ഉയർന്നിരിക്കുന്നു. വിശദമായ അന്വേഷണത്തിന് ശേഷം നടപടി എടുക്കുമെന്നും ക്ലബ് അധികൃതർ വ്യക്തമാക്കി.
സമ്മതമില്ലാതെ പെൺകുട്ടിയുടെ ചിത്രം താരങ്ങൾ പ്രചരിപ്പിച്ചെന്നാണ് കേസ്. പെൺകുട്ടിയ്ക്കും കുടുംബത്തിനും പിന്തുണയുമായി സ്പാനിഷ് മിനിസ്റ്റർ ഐറിൻ മോണ്ടെറോയും രംഗത്തെത്തിയിട്ടുണ്ട്. ലോകകപ്പ് വേദിയിലെ റുബിലിയാസിന്റെ വിവാദ ചുംബനത്തിന് പിന്നാലെയാണ് സ്പെയിനിൽ പുതിയ വിവാദം.
