200 ഏകദിന വിക്കറ്റുകൾ സ്വന്തമാക്കി ഇന്ത്യൻ സ്പിന്നർ രവീന്ദ്ര ജഡേജ. 175 ഇന്നിംഗ്സുകളിൽ നിന്നാണ് താരം ഈ നേട്ടത്തിലെത്തിയത്. ആദ്യമായാണ് ഒരു ഇന്ത്യൻ ഇടംകൈയൻ സ്പിന്നർ ഈ നേട്ടത്തിനൊപ്പമെത്തുന്നത്. 200 വിക്കറ്റ് ക്ലബ്ബിലെത്തുന്ന ഏഴാമത്തെ ഇന്ത്യൻ താരം കൂടിയാണ് ജഡു.
ഏഷ്യാ കപ്പിലെ സൂപ്പർ ഫോർ മത്സരത്തിൽ ബംഗ്ലാദേശിന്റെ ഷമീം ഹുസൈന്റെ വിക്കറ്റ് വീഴ്ത്തിയാണ് ജഡു ചരിത്രനേട്ടത്തിനൊപ്പമെത്തിയത്. മത്സരത്തിൽ പത്ത് ഓവർ എറിഞ്ഞ താരം 53 റൺസ് വിട്ടുകൊടുത്ത് ഒരു വിക്കറ്റ് വീഴ്ത്തി. ഇതോടെ 2000 റൺസും 200 വിക്കറ്റും നേടുന്ന രണ്ടാമത്തെ ഇന്ത്യൻ താരമെന്ന നേട്ടവും താരത്തിന്റെ പേരിലായി. മുൻപ് കപിൽ ദേവ് മാത്രമാണ് ഈ റെക്കോർഡ് സ്വന്തമാക്കിയിട്ടുള്ളത്. 182 ഏകദിനങ്ങളിൽ നിന്ന് 2578 റൺസാണ് ജഡേജയുടെ സമ്പാദ്യം. 225 ഏകദിനങ്ങൾ കളിച്ചിട്ടുള്ള കപിൽ ദേവ് 3783 റൺസും 253 വിക്കറ്റുകളുമാണ് നേടിയിട്ടുള്ളത്.
2009-ൽ റിക്കിപോണ്ടിംഗിന്റെ വിക്കറ്റ് വീഴ്ത്തിയാണ് താരം വേട്ട ആരംഭിച്ചത്. 50 ഓവർ ഫോർമാറ്റിൽ ഏഴ് തവണ നാല് വിക്കറ്റും ഒരു തവണ അഞ്ച് വിക്കറ്റും ജഡേജ സ്വന്തമാക്കിയിട്ടുണ്ട്. 2013-ലെ ചാമ്പ്യൻസ് ട്രോഫിയിൽ വിൻഡീസിനെതിരെ നേടിയ അഞ്ച് വിക്കറ്റ് നേട്ടമാണ് (5/36) ജഡേജയുടെ ഏറ്റവും മികച്ച ഏകദിന പ്രകടനം.
Comments