സിനിമ നിർമ്മാണ രംഗത്ത് പത്ത് വർഷം തികയുന്ന വേളയിൽ പുതിയ രണ്ട് ചിത്രങ്ങൾ പ്രഖ്യാപിച്ച് വീക്കെൻഡ് ബ്ലോക്ക്ബസ്റ്റേഴ്സ്. ബാംഗ്ലൂർ ഡേയ്‌സ് എന്ന സൂപ്പർഹിറ്റ് ചിത്രം നിർമ്മിച്ച് കൊണ്ടാണ് വീക്കെൻഡ് ബ്ലോക്ക്ബസ്റ്റേഴ്സ് മലയാള സിനിമ നിർമ്മാണ രംഗത്തേക്ക് കടന്നുവന്നത്. അതിന് ശേഷം കാട് പൂക്കുന്ന നേരം, മുന്തിരിവള്ളികൾ തളിർക്കുമ്പോൾ, പടയോട്ടം, മിന്നൽ മുരളി, ആർഡിഎക്‌സ് തുടങ്ങിയ ചിത്രങ്ങളും മലയാള സിനിമാ ലോകത്തിന് സമ്മാനിച്ചു.
ഓണത്തിന് തിയേറ്ററിലെത്തിയ ആർഡിഎക്‌സിന്റെ തകർപ്പൻ വിജയത്തിന് ശേഷം വീക്കെന്റ് ബ്ലോക്ക്ബസ്റ്റേഴ്‌സിന്റെ ബാനറിൽ സോഫിയാ പോൾ നിർമ്മിക്കുന്ന പുതിയ ചിത്രത്തിന് ഇന്ന് ആരംഭം കുറിച്ചിരിക്കുകയാണ്. കൊച്ചി ഇടപ്പള്ളി അഞ്ചുമന ദേവീ ക്ഷേത്രത്തിൽ പൂജാ ചടങ്ങോടെയാണ് ചിത്രത്തിന് ആരംഭം കുറിച്ചത്. സുപ്രിയ പൃഥ്വിരാജ്, ആന്റണി വർഗീസ് എന്നിവർ ചേർന്ന് ദീപം തെളിയിച്ചു. പോൾ ജയിംസ് സ്വിച്ചോൺ കർമ്മവും സെഡിൻ പോൾ ഫസ്റ്റ് ക്ലാപ്പും നൽകി. ആർ ഡി എക്‌സിന്റെ സംവിധായകൻ നഹാസ് ഹിദായത്ത്, അനശ്വര രാജൻ, അലക്‌സ്.ജെ.പുളിക്കൽ എന്നിങ്ങനെ നിരവധി പ്രമുഖരും ചടങ്ങിൽ പങ്കെടുത്തു.
ആന്റണി വർഗീസ് നായകനാകുന്ന പുതിയ ചിത്രം നവാഗതനായ അജിത് മാമ്പള്ളിയാണ് സംവിധാനം ചെയ്യുന്നത്. പ്രശസ്ത തമിഴ് സംവിധായകൻ എസ്എ പ്രഭാകരൻ, സലീൽ – രഞ്ജിത്ത് (ചതുർമുഖം), ഫാന്റം പ്രവീൺ (ഉദാഹരണം സുജാത), പ്രശോഭ് വിജയൻ (അന്വേഷണം) തുടങ്ങിയവർക്കൊപ്പം സഹസംവിധായകനായിരുന്നു അജിത് മാമ്പള്ളി. ഈ ചിത്രത്തെ കൂടാതെ മറ്റ് മൂന്ന് ചിത്രങ്ങൾ കൂടി പത്താം വാർഷികത്തോടനുബന്ധിച്ച് വീക്കെൻഡ് ബ്ലോക്ക്ബസ്റ്റേഴ്സ് അന്നൗൺസ് ചെയ്യാനായി തയാറെടുക്കുന്നുണ്ട്.
കടലിന്റെ പശ്ചാത്തലത്തിൽ ഒരു റിവഞ്ച് ആക്ഷൻ ഡ്രാമയാണ് ആന്റണി വർഗീസ് നായകനാകുന്ന ചിത്രത്തിലൂടെ അവതരിപ്പിക്കുന്നത്. ആർഡിഎക്‌സ് പോലെ വിശാലമായ ക്യാൻവാസിൽ വലിയ ബഡ്ജറ്റിൽ അവതരിപ്പിക്കുന്ന ചിത്രമാണിത്. ആർഡിഎക്സിൽ മികച്ച പ്രകടനം കാഴ്‌ച്ചവെച്ച ആന്റണി വർഗീസിന് വീണ്ടും മികച്ച മറ്റൊരു കഥാപാത്രത്തെ അവതരിപ്പിക്കുവാനുള്ള അവസരം ഈ ചിത്രത്തിലൂടെ ലഭിച്ചിരിക്കുകയാണ്.
മലയാളത്തിലെ പ്രമുഖ താരങ്ങളാണ് ചിത്രത്തിൽ അണിനിരക്കുന്നത്. റോയലിൻ റോബർട്ട്, സതീഷ് തോന്നയ്‌ക്കൽ, അജിത് മാമ്പള്ളി എന്നിവരുടേതാണ് തിരക്കഥ. സംഗീതം, പശ്ചാത്തല സംഗീതം – സാം സി എസ്, ഛായാഗ്രഹണം – ജിതിൻ സ്റ്റാൻ സിലോസ്, എഡിറ്റിംഗ്- ശ്രീജിത്ത് സാരംഗ്, കലാസംവിധാനം – മനു ജഗത്, മേക്കപ്പ് – അമൽ ചന്ദ്ര, കോസ്റ്റ്യൂം ഡിസൈൻ – നിസ്സാർ അഹമ്മദ്, നിർമ്മാണ നിർവ്വഹണം – ജാവേദ് ചെമ്പ്.ഡിജിറ്റൽ മാർക്കറ്റിംഗ് അനൂപ് സുന്ദരൻ,പി ആർ ഓ ശബരി. ഒക്ടോബർ പകുതിയോടെയാണ് സിനിമയുടെ ചിത്രീകരണം ആരംഭിക്കുന്നത്. രാമേശ്വരം, കൊല്ലം, വർക്കല, അഞ്ചുതെങ്ങ് എന്നിവിടങ്ങളിലായിരിക്കും ചിത്രീകരണം നടക്കുക.
