ഏകദിന ക്രിക്കറ്റ് ലോകകപ്പിൽ ഇന്ത്യയെ നയിക്കാൻ യോഗ്യൻ നായകൻ രോഹിത് ശർമ്മയെന്ന് പാകിസ്താൻ ഇതിഹാസം വസീം അക്രം. ക്രീസിൽ വളരെ ശാന്തനാണ് രോഹിതെന്നും അദ്ദേഹത്തിന് ടീമിനെ മനോഹരമായി നയിക്കാനറിയാമെന്നും വസീം അക്രം പറഞ്ഞു.
വർഷങ്ങളായി ക്രിക്കറ്റ് കളിക്കുന്ന വളരെയധികം പരിചയസമ്പത്തുളള താരമാണ് രോഹിത് ശർമ്മ. ഇന്ത്യയുടെ ലോകകപ്പ് ടീം വളരെ മനോഹരമാണ്. ലോകക്രിക്കറ്റിലെ ഏറ്റവും മികച്ച സംഘമാണ് ഇന്ത്യയ്ക്കുളളത്. – അക്രം വ്യക്തമാക്കി.
ലോകകപ്പിലെ ഇന്ത്യയുടെ പ്രധാന ആയുധം ഹാർദിക് പാണ്ഡ്യയാണ്. ലോകകപ്പ് കിരീടം നേടാൻ ഞാൻ ആഗ്രഹിക്കുന്ന ടീമുകളിലൊന്നാണ് ഇന്ത്യ. അവർ ഇന്ത്യൻ മണ്ണിൽ പന്തെറിയുമ്പോൾ എത്ര അപകടകാരികളാകുമെന്ന് നമ്മൾ കണ്ടതാണ്.
രോഹിതിനെ പിന്തുണയ്ക്കാൻ വിരാട് കോഹ്ലി ടീമിലുണ്ട്. ഇഷാൻ കിഷനെയും ശുഭ്മാൻ ഗില്ലിനെയും പോലുളള മികച്ച യുവതാരങ്ങളും ടീമിന്റെ ഭാഗമാണ്. കെഎൽ രാഹുലും ടീമിൽ തിരിച്ചെത്തി. ലോകകപ്പിന് മുമ്പ് ഇന്ത്യൻ ടീം ശരിയായ ദിശയിലാണ് പോകുന്നതെന്നും അദ്ദേഹം കൂട്ടിച്ചേർത്തു.
