നിരവധി സീരിയലുകളിലൂടെ കുടുംബ പ്രേക്ഷകരുടെ പ്രിയതാരമായി മാറിയ നടനായിരുന്നു ശബരിനാഥ്. നടനായും വില്ലനായും മലയാള ടെലിവിഷൻ പരമ്പരകളിൽ നിറഞ്ഞ് നിൽക്കുമ്പോഴായിരുന്നു താരത്തിന്റെ അപ്രതീക്ഷിത വിയോഗം. സീരിയൽലോകത്തെ ഒന്നടങ്കം ഞെട്ടിച്ച വാർത്ത കൂടിയായിരുന്നു അത്. പ്രതീക്ഷിക്കാതെ എത്തിയ മരണ വാർത്ത ആരാധകരെയും തളർത്തിയിരുന്നു. ഒന്നിലധികം പരമ്പരകളിൽ അഭിനയിക്കുന്നതിനിടെയായിരുന്നു താരത്തിന്റെ അപ്രതീക്ഷിത വിയോഗം.
ശബരിയുടെ അടുത്ത സുഹൃത്തുക്കളിലൊരാളാണ് സാജൻ സൂര്യ. കഴിഞ്ഞ ദിവസം സാജൻ സൂര്യ പങ്കുവെച്ച ഒരു പോസ്റ്റ് ഇപ്പോൾ ശ്രദ്ധേയമാവുകയാണ്. ശബരിനാഥിന്റെ മൂന്നാം ഓർമ്മദിനത്തിൽ മറക്കാതെ പ്രിയ കൂട്ടുകാരന്റെ ഓർമ്മകൾ പങ്കുവെച്ചിരിക്കുകയാണ് സാജൻ സൂര്യ. ശബരിനാഥിനൊപ്പമുള്ള ചിത്രവും ഹൃദയസ്പർശിയായ ഒരു കുറിപ്പും താരം സമൂഹമാദ്ധ്യമങ്ങളിൽ പങ്കുവെച്ചു.
‘കൂട്ടുവെട്ടി പിരിഞ്ഞതല്ല കൂട്ടുകാരൻ… നമ്മളെ കാക്കാൻ ദൈവത്തോടൊപ്പം കൂടിയതാ.. പക്ഷേ ഞങ്ങൾക്കിഷ്ടം കൂടെ നിന്ന് സംരക്ഷിക്കുന്നതായിരുന്നു. പണ്ടേ പറഞ്ഞാൽ അനുസരണയില്ലാത്തവനായി പോയി ‘… എന്നാണ് സാജൻ സൂര്യ പങ്കുവെച്ച കുറിപ്പ്. മുൻപ് പലപ്പോഴും പ്രിയ സുഹൃത്തിനൊപ്പമുള്ള ഓർമ്മകൾ പങ്കുവെച്ച് സാജൻ സൂര്യ എത്തിയിരുന്നു.
ഒന്നിച്ച് പോയ യാത്രകളിലെ പ്രിയനിമിഷങ്ങളിൽ പലതും അദ്ദേഹം സോഷ്യൽമീഡിയയിലൂടെ പങ്കുവെച്ചിരുന്നു. യാത്രയ്ക്കിടയിൽ പകർത്തിയ ചിത്രങ്ങളും വീഡിയോകളുമടക്കം സാജൻ പങ്കുവെച്ചിരുന്നു. ഒരേ നാട്ടുകാരും സമാനമായ ചിന്താഗതികളുമൊക്കെയാണ് ഇരുവരെയും സുഹൃത്തുക്കളാക്കിയതെന്ന് സാജൻ സൂര്യ പറഞ്ഞിരുന്നു.
2020 സെപ്റ്റംബർ 17- നായിരുന്നു ശബരിനാഥിന്റെ വിയോഗം. ബാഡ്മിന്റൺ കളിക്കുന്നതിനിടെ കുഴഞ്ഞുവീണ അദ്ദേഹത്തെ ഉടനെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. ടെക്നോപാർക്കിൽ ജോലി ചെയ്യുന്ന സമയത്തായത്താണ് ശബരി അഭിനയത്തിലേയ്ക്ക് കടന്ന് വന്നത്. ചുരുങ്ങിയ സമയംകൊണ്ട് ഒട്ടനവധി പരമ്പരകളിൽ താരം വേഷമിട്ടു.
