ഗണേശ ചതുർത്ഥി ദിനം രാജ്യത്തുടനീളം ആഘോഷിക്കുമ്പോൾ മകളോടൊപ്പമുള്ള രസകരമായ ചിത്രം സാമൂഹ്യമാദ്ധ്യമങ്ങളിൽ പങ്കുവെച്ച് കൊണ്ട് ആശംസകൾ നേർന്ന് പ്രീയങ്ക ചോപ്ര. ഇൻസ്റ്റഗ്രാമിലാണ് പ്രിയങ്ക മകളുടെ ചിത്രങ്ങൾ പങ്കുവെച്ചത്. താരത്തിന്റെയും മകളുടെയും ചിത്രങ്ങൾ ഇതിനോടകം തന്നെ സാമൂഹ്യമാദ്ധ്യമ ലോകം ഏറ്റെടുത്തിരിക്കുകയാണ്.
ഗണപതിയുടെ രൂപത്തിലുള്ള പാവയും കൈയിൽ പിടിച്ച് നിൽക്കുന്ന മകളുടെ കുസൃതി നിറഞ്ഞ ചിത്രമാണ് പ്രിയങ്ക പങ്കുവെച്ചിരിക്കുന്നത്. ചിത്രത്തോടൊപ്പം ആരാധകർക്ക് ഗണേശ ചതുർത്ഥി ആശംസകളും നേരുന്നുണ്ട്. ചിത്രത്തോടൊപ്പമുള്ള പ്രിയങ്കയുടെ അടികുറിപ്പാണ് ശ്രദ്ധേയമാകുന്നത്. ‘ഈ പെൺകുട്ടിയും അവളുടെ ഗണപതിയും എന്നും എപ്പോഴും നമ്മോടൊപ്പമുണ്ട്’എന്നാണ് പ്രിയങ്ക കുറിച്ചത്. നിരവധി ആരാധകരാണ് ആശംസകൾ അറിയിച്ചും സന്തോഷം പങ്കുവെച്ചും രംഗത്തെത്തിയത്.
മാൾട്ടി മറിയ എന്നാണ് പ്രിയങ്ക- നിക്ക് ജോനാസ് ദമ്പതികളുടെ മകളുടെ പേര്. മകളുടെ വാത്സല്യമാർന്ന ചിത്രം ആവേശത്തോടെയാണ് ആരാധകർ ഏറ്റെടുത്തിരിക്കുന്നത്. 2018-ലാണ് ഉമൈദ് ഭവൻ കൊട്ടാരത്തിൽ വെച്ച് പ്രിയങ്ക ചോപ്രയും നിക്ക് ജോനാസും വിവാഹിതരായത്. കഴിഞ്ഞ വർഷമായിരുന്നു വാടക ഗർഭപാത്രത്തിലൂടെ ഒരു പെൺകുട്ടിയ്ക്ക് ജന്മം നൽകിയെന്ന വിവരം പ്രിയങ്ക പങ്കുവെച്ചത്.
Comments