മലപ്പുറം: മത്സരം കാണാൻ ചുറ്റും നിന്നവരെയെല്ലാം അമ്പരപ്പിച്ച് ഒന്നൊന്നര ഓട്ടമോടി സാമൂഹ്യമാദ്ധ്യമത്തിൽ ശ്രദ്ധേയനായി ഒന്നാം ക്ലാസുകാരൻ. പയ്യനാട് വടക്കാങ്ങര എഎംയുപി സ്‌കൂളിലെ ഈ ഒന്നാം ക്ലാസുകാരനായ ഹബീബ് റഹ്‌മാനാണ് ഓട്ടമത്സരത്തിൽ അതി വേഗത്തിലോടി കൈയ്യടി നേടുകയും സാമൂഹ്യമാദ്ധ്യമങ്ങളിൽ തരംഗമാകുകയും ചെയ്തത്. ഹബീബിന്റെ ഓട്ടമത്സരത്തിന്റെ വീഡിയോ വലിയ തോതിൽ ജനശ്രദ്ധ നേടുകയാണ്.
മത്സരം തുടങ്ങി നിമിഷങ്ങൾക്കകം ലക്ഷ്യ സ്ഥാനത്തെത്തിയ കൊച്ചു മിടുക്കന്റെ പ്രകടനമാണ് സാമൂഹ്യമാദ്ധ്യമത്തിൽ പ്രചരിക്കുന്നത്. സ്‌കൂളിലെ കായികമേളയിലാണ് അമ്പരിപ്പിച്ച ഓട്ടവുമായി ഹബീബെത്തിയത്. കൂടെയുള്ള മറ്റ് മത്സരാർത്ഥികളെ പിന്നിലാക്കി അതിവേഗം ഓടിയ ഹബീബാണ് ഇപ്പോൾ സാമൂഹ്യമാദ്ധ്യമ ലോകം കൈയ്യടക്കിയിരിക്കുന്നത്. വീഡിയോ വൈറലായതോടെ നിരവധി പേർ ഒന്നാം ക്ലാസുകാരന്റെ ഫാനായി മാറിയിരിക്കുകയാണ്.
ഹബീബിന്റെ ഓട്ടം വിദ്യാഭ്യാസ മന്ത്രി വി ശിവൻകുട്ടിയും ഫേസ്ബുക്കിലൂടെ പങ്കുവെയ്‌ക്കുകയും ചെയ്തു. ഈ ഒന്നാം ക്ലാസുകാരൻ ഭാവിയിൽ ഒരു ഉസൈൻ ബോൾട്ടായി മാറുമെന്നാണ് പലരും പറയുന്നത്. നിരവധി പേരാണ് മന്ത്രിയുടെ പോസ്റ്റിന് താഴെ അഭിപ്രായങ്ങളും ആശംസയും അറിയിച്ച് രംഗത്തെത്തിയത്.
