ഭാരതത്തിൽ നിർമ്മിച്ച ഐ ഫോൺ സ്വന്തമാക്കിയ സന്തോഷം പങ്കുവെച്ച് നടൻ മാധവൻ. ആപ്പിൾ പുതുതായി പുറത്തിറക്കിയ ഐഫോൺ 15 സീരീസാണ് നടൻ സ്വന്തമാക്കിയത്. ‘ഇന്ത്യയിൽ നിർമ്മിച്ച ഐഫോൺ 15 സ്വന്തമാക്കിയതിൽ ‘അഭിമാനവും ആവേശവും’ ഉണ്ടെന്ന് മാധവൻ എക്‌സിൽ കുറിച്ചു. കുറിപ്പിനൊപ്പം പുതിയ പുതുതായി സ്വന്തമാക്കിയ പിങ്ക് നിറത്തിലുള്ള ഐഫോൺ 15ന്റെ ചിത്രവും പങ്കുവെച്ചിട്ടുണ്ട്. ത്രിവർണ്ണ പതാകളുടെ ഇമോജികളും കുറിപ്പിനൊപ്പം മാധവൻ ചേർത്തിട്ടുണ്ട്.
ആപ്പിളിന്റെ ഇന്ത്യൻ നിർമിത ഐഫോൺ ഇന്ന് മുതലാണ് വിപണിയിൽ എത്തിയത്. മുൻകൂട്ടി ഓർഡർ ചെയ്തവർക്ക് ഇന്ന് ആപ്പിൾ സ്റ്റോറുകളിലെത്തി പണമടച്ച് ഫോൺ കൊണ്ടുപോകാവുന്നതാണ്. ഇന്ത്യയിലെ രണ്ട് ആപ്പിൾ സ്റ്റോറുകളിലൊന്ന് സ്ഥിതിചെയ്യുന്ന ഡൽഹിയിലെ സാകേതിലുള്ള സിറ്റിവാക്ക് മാളിൽ ഫോൺ വാങ്ങാനെത്തിയവരുടെ വലിയ നിരയാണ് അനുഭവപ്പെട്ടത്.
ഐഫോൺ നിർമാണത്തിന്റെ നല്ലൊരു പങ്കും മുൻപ് ചൈന കേന്ദ്രീകരിച്ചായിരുന്നു നടന്നത്. 2020 മുതലാണ് ആപ്പിൾ അതിന്റെ മുൻനിര ഐഫോണുകളുടെ ഭാഗങ്ങൾ ഇന്ത്യയിൽ നിർമ്മിച്ചു തുടങ്ങിയത്. 2025ഓടെ 25 ശതമാനം ഐഫോണുകളും ഇന്ത്യയിൽ ഉൽപ്പാദിപ്പിക്കാനാണ് ആപ്പിൾ ലക്ഷ്യമിടുന്നത്. തമിഴ്നാട്ടിലെ ശ്രീപെരുമ്പത്തൂരിൽ ഫോക്സ്‌കോൺ ടെക്നോളജി ഗ്രൂപ്പിന്റെ പ്ലാന്റിലാണ് ഐഫോൺ നിർമാണം.
