ഏകദിന ക്രിക്കറ്റ് ലോകകപ്പിനുളള പാകിസ്താൻ ക്രിക്കറ്റ് ടീമിനെ പ്രഖ്യാപിച്ചു. 15 അംഗ ടീമിനെയാണ് പിസിബി പ്രഖ്യാപിച്ചത്. ഏഷ്യാ കപ്പിനിടെ തോളെല്ലിന് പരിക്കേറ്റ പേസർ നസീം ഷായ്ക്ക് പകരം ഹസൻ അലിയെ ടീമിലുൾപ്പെടുത്തിയിട്ടുണ്ട്. ഈ വർഷം ആദ്യം ന്യൂസിലൻഡിനെതിരെ നടന്ന ഏകദിനത്തിൽ അരങ്ങേറിയ ലെഗ് സ്പിന്നർ ഉസാമ മിറാണ് ടീമിലെ സർപ്രൈസ് താരം.
പാകിസ്താൻ ടീമിന്റെ ബൗളിംഗ് നിരയുടെ ശക്തമായ താരമായിരുന്നു നസീം ഷാ. താരത്തിന്റെ അഭാവം നിരാശ നൽകുന്നുണ്ടെങ്കിലും താരം ഉടൻ ക്രിക്കറ്റിലേക്ക് മടങ്ങിയെത്തുമെന്ന് ചീഫ് സെലക്ടർ ഇൻസമാം ഉൾ ഹഖ് പറഞ്ഞു. പരിചയസമ്പത്തും ലങ്കൻ പ്രീമിയർ ലീഗിലെ (എൽപിഎൽ) പ്രകടനവുമാണ് ഹസൻ അലിക്ക് അനുകൂലമായത്. ഏത് പ്രതികൂല സാഹചര്യത്തിനും പന്തെറിയാനുളള കഴിവ് ഹസൻ അലിക്കുണ്ടെന്നും അദ്ദേഹം കൂട്ടിച്ചേർത്തു. 91 വിക്കറ്റുകളാണ് ഹസൻ അലി തന്റെ ദേശീയ ടീമിനായി നേടിയത്.
പാകിസ്താൻ ടീം
ബാബർ അസം, ഷദാബ് ഖാൻ, ഫഖർ സമാൻ, ഇമാം ഉൾ ഹഖ്, അബ്ദുള്ള ഷഫീഖ്, മുഹമ്മദ് റിസ്വാൻ, സൗദ് ഷക്കീൽ, ഇഫ്തിഖർ അഹമ്മദ്, ആഖ സൽമാൻ, മുഹമ്മദ് നവാസ്, ഉസാമ മിർ, ഹാരിസ് റൗഫ്, ഹസൻ അലി, ഷഹീൻ ഷാ അഫ്രിദി, മുഹമ്മദ് വസീം.
റിസർവ് താരങ്ങൾ: മുഹമ്മദ് ഹാരിസ്, സമാൻ ഖാൻ, അബ്രർ അഹമ്മദ്.
