ന്യൂഡൽഹി: ഡൽഹി യൂണിവേഴ്സിറ്റി തിരഞ്ഞെടുപ്പിലെ എബിവിപിയുടെ വിജയത്തിന് ആശംസകൾ അർപ്പിച്ച് ബിജെപി ദേശീയ അദ്ധ്യക്ഷൻ ജെപി നദ്ദ. എബിവിപിക്ക് ലഭിച്ച വിജയം രാജ്യത്തിന്റെ ഭാവിയെ രൂപപ്പെടുത്തുന്നതാണെന്നും രാഷ്ട്രം ആദ്യം, എന്ന ആശയത്തിന് ലഭിക്കുന്ന സർവ്വവ്യാപിയായ സ്വീകാര്യതയാണെന്നും അദ്ദേഹം പറഞ്ഞു. എബിവിപിയിലൂടെയാണ് ജെപി നദ്ദ രാഷ്ട്രീയത്തിൽ രംഗപ്രവേശം ചെയ്യുന്നത്. ദേശീയ ജനറൽ സെക്രട്ടറിയായി അദ്ദേഹം ചുമതല വഹിച്ചിട്ടുണ്ട്. എക്സിൽ പങ്കുവെച്ച കുറിപ്പിലാണ് അദ്ദേഹം അഭിനന്ദനം അറിയിച്ചത്.
സ്വാമി വിവേകാനന്ദന്റെ ആദർശങ്ങളിൽ നിന്ന് പ്രചോദനം ഉൾക്കൊണ്ടാണ് എബിവിപി പ്രവർത്തിക്കുന്നത്. വിദ്യാർത്ഥികളുടെ ഹൃദയങ്ങളിൽ എബിവിപി ദേശീയതയുടെയും നിസ്വാർത്ഥ സേവനത്തിന്റെയും ജ്വാല എക്കാലവും ജ്വലിപ്പിച്ചിട്ടുണ്ട്. ഡൽഹി യൂണിവേഴ്സിറ്റി തിരഞ്ഞെടുപ്പിലെ മികച്ച വിജയത്തിന് എബിവിപിയുടെ എല്ലാ പ്രവർത്തകരെയും താൻ അഭിനന്ദിക്കുന്നു. നമ്മുടെ രാജ്യത്തിന്റെ ഭാവിയെ രൂപപ്പെടുത്തുന്ന വിജയമാണ്. ‘ആദ്യം രാഷ്ട്രം’ എന്ന ആശയത്തിന് ലഭിക്കുന്ന സർവ്വവ്യാപിയായ സ്വീകാര്യതയാണ് ഈ വിജയം കാണിക്കുന്നതെന്നും അദ്ദേഹം പറഞ്ഞു.
മൂന്ന് വർഷത്തെ ഇടവേളയ്ക്ക് ശേഷം നടന്ന ഡൽഹി സർവകലാശാല തിരഞ്ഞെടുപ്പിൽ എബിവിപി വൻ വിജയമാണ് കാഴ്ച്ചവെച്ചത്. നാല് പാനലുകളിൽ മൂന്നിലും എബിവിപി സ്ഥാനാർത്ഥികൾ വിജയം കണ്ടു. ഇതോടെ യൂണിവേഴ്സിറ്റിയിൽ എബിവിപി വീണ്ടും ഭരണമുറപ്പിച്ചു. പ്രസിഡന്റ്, സെക്രട്ടറി ജോയിന്റ് സെക്രട്ടറി എന്നീ സ്ഥനങ്ങളാണ് എബിവിപി വിജയിച്ചത്. വൈസ് പ്രസിഡന്റ് എൻഎസ് യു തുശ്ചമായ വോട്ടിന് വിജയിക്കുകയായിരുന്നു.
