മുംബൈ: രാജ്യത്തെ ആദ്യ ബുള്ളറ്റ് ട്രെയിൻ മഹാരാഷ്ട്രയിൽ യഥാർത്ഥ്യമാകുന്ന സുദിനത്തിനായാണ് രാജ്യം ആകാംക്ഷയോടെ കാത്തിരിക്കുന്നത്. വൻ പദ്ധതിയുടെ ഭാഗമായി താന ഡിപ്പോ തയ്യാറെടുക്കുകയാണ്. 508 കിലോമീറ്റർ ദൂരത്തിലാണ് പദ്ധതി നടപ്പിലാക്കുന്നത്. ഇതിൽ 153 കിലോമീറ്റർ മഹാരാഷ്ട്രയിലാണ്. നാഷണൽ ഹൈസ്പീഡ് റെയിൽ കോർപ്പറേഷനാണ് ഇതിന്റെ ചുമതല. കേന്ദ്ര സർക്കാരും സംസ്ഥാന സർക്കാരും തമ്മിലുള്ള സംയുക്ത സഹകരണമാണ് പദ്ധതി. ജാപ്പനീസ് ഷിൻകാൻസെൻ ഡിപ്പോകളുടെ ശൈലിയിലാണ് ഇതിന്റെ രൂപകൽപ്പന.
താനെ ഡിപ്പോ 57 ഹെക്ടർ വിസ്തൃതിയിൽ അടിസ്ഥാന സൗകര്യങ്ങളോടെ വികസിപ്പിച്ചെടുത്തതാണ്. ഷിൻകാൻസെന്ഡ അല്ലെങ്കിൽ ബുള്ളറ്റ് ട്രെയിൻ സംവിധാനത്തിന് സമാനമായ രീതിയിൽ ഉയർന്ന സുരക്ഷ മുൻനിർത്തിയാണ് ട്രെയിനിന്റെ രൂപകൽപ്പന. പ്രാരംഭ ഘട്ടത്തിൽ ഡിപ്പോയിൽ നാല് ഇൻസ്പെക്ഷൻ ലൈനുകളും 10 സ്റ്റെബ്ലിംഗ് ലൈനുകളുമാണ് സജ്ജീകരിക്കുന്നത്.
കൂടാതെ ഡിപ്പോയിൽ ശരിയായ രീതിയിലുള്ള മാലിന്യ സംസ്കരണവും ഉറപ്പു വരുത്തുന്നുണ്ട്. മാലിന്യവും മറ്റ് വസ്തുക്കളും കൈകാര്യം ചെയ്യുന്നതിനായി യന്ത്രവത്കൃത സൗകര്യങ്ങളാണ് സജ്ജീകരിക്കുക. താനെയിൽ അനുഭവപ്പെടുന്ന മഴയെ നേരിടുന്നതിനായി ഡ്രെയിനേജ് സംവിധാനങ്ങൾ രൂപകൽപ്പന ചെയ്തിട്ടുണ്ട്.