ന്യൂഡൽഹി: ഏഷ്യൻ ഗെയിംസിൽ സ്വർണം നേടിയ ഇന്ത്യൻ ക്രിക്കറ്റ് ടീമിനെ അഭിനന്ദിച്ച് കേന്ദ്ര യുവജന കാര്യ കായിക വകുപ്പ് മന്ത്രി അനുരാഗ് ഠാക്കർ. സമൂഹമാദ്ധ്യമത്തിലൂടെയാണ് അദ്ദേഹത്തിന്റെ വാക്കുകൾ. വിസ്മയകരമായ അരങ്ങേറ്റത്തിന് വനിതാ ക്രിക്കറ്റ് ടീമിന് അഭിനന്ദനങ്ങൾ നേരുന്നതായാണ് അദ്ദേഹം പറഞ്ഞു.
വീറുള്ള പ്രകടനത്തിലൂടെയും ഫീൽഡിംഗിലൂടെയും ക്രിക്കറ്റിലെ എക്കാലത്തെയും മികച്ച മെഡൽ ഇന്ത്യയിലേക്ക് എത്തിച്ചിരിക്കുകയാണ് ഇന്ത്യൻ ടീം. ഈ ചരിത്ര വിജയം അവരുടെ ധീരതയുടെയും അജയ്യമായ ചൈതന്യത്തിന്റെയും പ്രതിരോധത്തിന്റെയും തെളിവാണ്. ഇത് ഏഷ്യൻ ഗെയിംസ് ചരിത്രത്തിൽ എന്നെന്നേക്കുമായി ഇടം പിടിക്കും – അദ്ദേഹം കൂട്ടിച്ചേർത്തു.
അത്യന്തം ആവേശകരമായ മത്സരത്തിൽ ശ്രീലങ്കയെ തറപ്പറ്റിച്ച് ഇന്ത്യൻ വനിതകൾക്ക് സ്വർണം. ഏഷ്യൻ ഗെയിംസ് അരങ്ങേറ്റത്തിലാണ് വനിതകളുടെ ഈ നേട്ടം. 19 റൺസിനായിരുന്നു ഇന്ത്യയുടെ വിജയം. 116 റൺസ് വിജയലക്ഷ്യം പിന്തുടർന്ന ലങ്കയ്ക്ക് നിശ്ചിത ഓവറിൽ 8 വിക്കറ്റ് നഷ്ടത്തിൽ 97 റൺസെടുക്കാനെ കഴിഞ്ഞുള്ളു. ഏഷ്യൻ ഗെയിംസിൽ ഇന്ത്യയുടെ രണ്ടാമത്തെ സ്വർണമാണ് ഇത്.
