ഇന്ന് 41-ാം ജന്മദിനം ആഘോഷിക്കുകയാണ് നടൻ രൺബീർ കപൂർ. തന്റെ കരിയറിലെ ഏറ്റവും പ്രതീക്ഷ നൽകിയിരിക്കുന്ന ചിത്രത്തിന്റെ ടീസർ പുറത്തിറക്കാൻ ജന്മദിനം തന്നെ തിരഞ്ഞെടുത്തിരിക്കുകയാണ് അദ്ദേഹം. ഏറ്റവും പുതിയ ചിത്രമായ അനിമലിന്റെ ടീസറാണ് ഇന്ന് പുറത്തു വന്നത്. ചിത്രം ഓഗസ്റ്റിൽ തിയറ്ററുകളിൽ എത്തുമെന്ന് നേരത്തെ പറഞ്ഞിരുന്നെങ്കിലും പലകാരണങ്ങളാൽ മാറുകയായിരുന്നു. യുവതാരം എന്നതിൽ നിന്ന് മാറി സൂപ്പർസ്റ്റാർ രൺബീർ കപൂർ എന്നാണ് അനിമലിൽ താരത്തെ പരിചയപ്പെടുത്തിയിരിക്കുന്നത്.
ഒരു ആക്ഷൻ ത്രില്ലർ ചിത്രമാണ് അനിമൽ. പതിവിൽ നിന്ന് ഏറെ വ്യത്യസ്തമായ കഥാപാത്രത്തെയാണ് രൺബീർ ചിത്രത്തിൽ അവതരിപ്പിക്കുന്നത്. തെന്നിന്ത്യൻ താരസുന്ദരി രശ്മിക മന്ദാനയാണ് ചിത്രത്തിലെ നായിക. ചിത്രത്തിന്റെ ടീസർ പുറത്തുവിട്ട് മണിക്കൂറുകൾക്കുള്ളിൽ തന്നെ പ്രേക്ഷക ശ്രദ്ധ നേടുകയാണ്. വൻ താരനിരയിൽ ഒരുങ്ങുന്ന ചിത്രത്തിൽ ഏറെ നാളുകൾക്ക് ശേഷം ബോബി ഡിയോളും ഒരു ശ്രദ്ധേയമായ വേഷം അവതരിപ്പിക്കുന്നുണ്ട്.
രണ്ട് ഗെറ്റപ്പുകളിലാണ് ചിത്രത്തിൽ രൺബീർ എത്തുന്നത്. ഡബിൾ റോളിൽ ആണോ രൺബീർ ചിത്രത്തിൽ എത്തുക എന്നതരത്തിലാണ് പുതിയ സംശയങ്ങൾ ഉയരുന്നത്. രൺബീറിന്റെ ആക്ഷൻ-പാക്ക് സീക്വൻസുകളും ടീസറിനെ ശ്രദ്ധേയമാക്കുന്നുണ്ട്. അനിൽ കപൂറും ചിത്രത്തിൽ ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്. അർജ്ജുൻ റെഡ്ഡി സിനിമയുടെ സംവിധായകൻ സന്ദീപ് റെഡ്ഡിയാണ് അനിമലിന്റെ സംവിധായകൻ. ഡിസംബറിൽ ചിത്രം തിയറ്ററുകളിലെത്തും.
