പ്രമുഖ സൺഗ്ലാസ് ബ്രാൻഡ് ആയ റെയ്ബാനുമായി ചേർന്ന് പുതിയ സ്മാർട്ട് ഗ്ലാസ് അവതരിപ്പിച്ച് മെറ്റ. ഹെയ് മെറ്റ എന്ന് വിളിച്ചാൽ സജീവമാകുന്ന റെയ്ബാൻ സ്മാർട് ഗ്ലാസ് ആണ് ഇരു കമ്പനികളും സംയുക്തമായി അവതരിപ്പിച്ചിരിക്കുന്നത്. മെറ്റ കണക്ട് പരിപാടിയിൽ സിഇഒ മാർക്ക് സക്കർബർഗ് ആണ് ഗ്ലാസിന്റെ കാര്യം ഔദ്യോഗികമായി പ്രഖ്യാപിച്ചത്. എഐയുടെ സംവിധാനത്തിലാണ് മെറ്റയുടെ പുതിയ സ്മാർട്ട് ഗ്ലാസ് പ്രവർത്തിക്കുന്നത്. സ്മാർട് ഗ്ലാസിലൂടെ ലൈവ് സ്ട്രീം ചെയ്യാൻ സാധിക്കുന്നതായിരിക്കുമെന്ന് കമ്പനി വ്യക്തമാക്കി.
ഹാൻഡ്സ്ഫ്രീ ആയി ഉപയോഗിക്കാൻ സാധിക്കുന്ന ക്യാമറയാണ് ഇതിന്റെ പ്രധാന സവിശേഷത. സ്മാർട് ഗ്ലാസിലെ 12 മെഗാപിക്സൽ ക്യാമറയാണ് ഇതിലുള്ളത്. ഫേസ്ബുക്ക്, ഇൻസ്റ്റഗ്രാം എന്നിവയിൽ ലൈവ് വീഡിയോ സ്ട്രീമിംഗ് ഇതിലൂടെ സാദ്ധ്യമാകും. ഏകദേശം 25,000 രൂപയാണ് സൺഗ്ലാസിന്റെ വില. യുഎസ്, കാനഡ, ഓസ്ട്രേലിയ, യൂറോപ്യൻ എന്നീ രാജ്യങ്ങളിൽ നിന്നും ഒക്ടോബർ 17 മുതൽ സൺ ഗ്ലാസ് സ്വന്തമാക്കാനാകും. എന്നാൽ ഇന്ത്യയിൽ എന്നാണ് ലോഞ്ച് ചെയ്യുക എന്നത് സംബന്ധിച്ച വിവരങ്ങൾ ഇതുവരെ പ്രഖ്യാപിച്ചിട്ടില്ല.
പാട്ട് കേൾക്കുന്നതിനും വീഡിയോ, ഫോട്ടോ എന്നിവ കാണുന്നതിനും ഇവ അനുയോജ്യമായിരിക്കുമെന്ന് മെറ്റ അറിയിച്ചു. നേരിട്ട് കൺമുന്നിൽ സോഷ്യൽമീഡിയ പ്രവർത്തിക്കുന്ന തരത്തിലുള്ള അനുഭവം പകരാൻ സ്മാർട്ട് ഗ്ലാസിന് സാധിക്കുമെന്ന് കമ്പനി വാഗ്ദാനം ചെയ്യുന്നു. എഐയുടെ സേവനം ഉപഭോക്താക്കൾക്കിടയിൽ മെറ്റയുടെ ഉത്പന്നങ്ങളുടെ ഉപയോഗം വർദ്ധിപ്പിക്കാൻ സാധിക്കും എന്നാണ് പ്രതീക്ഷ.
