ഇന്ത്യൻ ബഹിരാകാശ ഏജൻസിക്ക് സൂര്യനും ചന്ദ്രനുമൊന്നും ഒരു പരിധിയല്ലെന്ന് തെളിച്ച് കൊണ്ടിരിക്കുകയാണ്. സൗരയൂഥത്തിനപ്പുറത്തേക്കുള്ള കാര്യങ്ങൾ കണ്ടെത്തുകയും അവ വിശകലനം ചെയ്യുകയുമാണ് ഇസ്രോയുടെ ലക്ഷ്യമെന്ന് കഴിഞ്ഞ ദിവസം ഐഎസ്ആർഒ ചെയർമാൻ എസ്.സോമനാഥ് പറഞ്ഞിരുന്നു.
ഭൂമിയുടെ അയൽഗ്രഹമായ ചൊവ്വയിൽ നിന്ന് ആരംഭിച്ച് സൗരയൂഥത്തിന് പുറത്തുള്ള ഗ്രഹങ്ങളെ കണ്ടെത്താനുള്ള ദൗത്യം വരെയുണ്ട്. ഇത് സംബന്ധിച്ച വിവരങ്ങളും അദ്ദേഹം പുറത്തുവിട്ടിരുന്നു. സൗരയൂഥത്തിന് പുറത്തുള്ളതും മറ്റ് നക്ഷത്രങ്ങളെ ചുറ്റുന്നതുമായ എക്സോ-സൗരഗ്രഹങ്ങളെയോ ഗ്രഹങ്ങളെയോ നിരീക്ഷിക്കുന്ന ദൗത്യം ഉടനുണ്ടാകും. ഇതിന് പുറമേ എക്സ്-റേ പോളാരിമീറ്റർ സാറ്റ്ലൈറ്റും (എക്സ്പോസാറ്റ്) ഈ വർഷം വിക്ഷേപിക്കും.
എക്സ്-റേ സ്രോതസുകളെ കുറിച്ച് പഠിക്കാൻ രൂപകൽപന ചെയ്ത ബഹിരാകാശ നിരീക്ഷണ സംവിധാനമാണ് ഇത്. കോസ്മിക് എക്സ്-റേകളുടെ ധ്രുവീകരണം പഠിക്കാൻ ആസൂത്രണം ചെയ്തിരിക്കുന്ന ദൗത്യമാണിത്. എസ്എസ്എൽവിയെന്ന ചെറിയ ഉപഗ്രഹ വിക്ഷേപണ വാഹനത്തിൽ വിക്ഷേപിക്കും. അഞ്ച് വർഷമെടുത്താകും പഠനം നടക്കുക. ബ്ലാക്ക് ഹോൾ എക്സ്-റേ ബൈനറികൾ, സജീവ ഗാലക്സി ന്യൂക്ലിയുകൾ, നോൺ-തെർമൽ സൂപ്പർനോവ അവശിഷ്ടങ്ങൾ എന്നിവയുൾപ്പെടെ പ്രപഞ്ചത്തിലെ അറിയപ്പെടുന്ന 50 തെളിച്ചമുള്ള സ്രോതസ്സുകളെക്കുറിച്ച് എക്സ്പോസാറ്റ് പഠിക്കും. തീവ്രമായ അവസ്ഥയിലെ ജ്യോതിശാസ്ത്ര എക്സ്-റേ സ്രോതസുകളെ വിവിധ ഡൈനാമിക് പഠിക്കാൻ ഉദ്ദേശിച്ചുള്ള ഇന്ത്യയുടെ ആദ്യത്തെയും ലോകത്തിലെ രണ്ടാമത്തേതുമായ പോളാരിമെട്രി ദൗത്യാമകും ഇത്. നാസ മാത്രമാണ് ഇതിന് മുൻപ് ഇത്തരത്തിലൊരു ദൗത്യം നടപ്പിലാക്കിയിട്ടുള്ളത്.
എക്സ്-റേകൾക്ക് 0.3 നാനോമീറ്ററിനും മൂന്ന് നാനോമീറ്ററിനും ഇടയിൽ വളരെ ഉയർന്ന ഊർജ്ജവും കുറഞ്ഞ തരംഗദൈർഘ്യവുമാണുള്ളത്. ചില എക്സ്-റേകൾ കണികയോളം വലുതായിരിക്കില്ല. ഇത്തരത്തിൽ എക്സ്-റേകൾ പുറപ്പെടുവിക്കുന്ന പൾസാറുകൾ, സൂപ്പർനോവ അവശിഷ്ടങ്ങൾ, തമോഗർത്തങ്ങൾ തുടങ്ങിയ ദശലക്ഷക്കണക്കിന് ഡിഗ്രി സെൽഷ്യസ് ഉള്ള വസ്തുക്കളെയാകും പേടകം പഠിക്കുക. ശാസ്ത്രലോകത്തെ പുത്തൻ കണ്ടെത്തലുകൾക്ക് ഇത് വഴിയൊരുക്കും.
ഭൂമിയുടെ താഴ്ന്ന ഭ്രമണപഥത്തിൽ രണ്ട് ശാസ്ത്രീയ പേലോഡുകൾ പേടകം വഹിക്കും. പ്രൈമറി പേലോഡ് പിഒഎൽഐഎക്സ് (എക്സ്-റേകളിലെ പോളാരിമീറ്റർ ഉപകരണം) പോളാരിമെട്രി പരാമീറ്ററുകൾ അളക്കും. ഇസ്രോയുടെ ബെംഗളൂരുവിലെ യുആർ റാവു സാറ്റ്ലൈറ്റ് സെന്ററുമായി സഹകരിച്ചാണ് ഇസ്രോ പേലോഡ് വികസിപ്പിക്കുന്നത്. പിഒഎൽഐഎക്സ് വിവിധ വിഭാഗങ്ങളിലെ 40 ജ്യോതിശാസ്ത്ര സ്രോതസുകള് നിരീക്ഷിക്കുമെന്നാണ് പ്രതീക്ഷ. പേടകത്തിന്റെ മറ്റൊരു പേലോഡാണ് എക്സ്സെപ്ക്റ്റ് (എക്സ്-റേ സെപ്ക്ട്രോസ്കോപ്പി ആന്റ് ടൈമിംഗ്) പേലോഡ്. എങ്ങനെയാണ് പ്രകാശം ആഗിരണം ചെയ്യപ്പെടുന്നതെന്നും വസ്തുക്കൾ പുറത്തുവിടുന്നതെന്നതും സംബന്ധിച്ചുള്ള പഠനങ്ങൾ നടത്തുന്നത് ഈ പേലോഡായിരിക്കും. എക്സ്-റേ പൾസാറുകൾ, ബ്ലാക്ക്ഹോൾ ബൈനറികൾ തുടങ്ങിയ നിരവധി തരത്തിലുള്ള സ്രോതസ്സുകളെയാകും ഇത് നിരീക്ഷിക്കുക.
