കഴിഞ്ഞ ദിവസമാണ് നയൻതാരയുടെ സ്കിൻ കെയർ ബ്രാൻഡായ 9 സ്കിൻ പ്രഖ്യാപിച്ചത്. വിഗ്നേഷ് ശിവന്റെയും നയൻതാരയുടെയും സോഷ്യൽ മീഡിയ അക്കൗണ്ടുകളിലൂടെ വൻ പ്രഖ്യാപനമാണ് നൽകിയത്. തുടർന്ന് സെപ്റ്റംബർ 29 ന് 9 സ്കിൻ ഉത്പന്നങ്ങളുടെ വിൽപ്പനയും ആരംഭിച്ചു. ആരാധകരും വളരെ ആവേശത്തോടെയാണ് 9 സ്കിൻ ഏറ്റെടുത്തതെങ്കും വില കേട്ടപ്പോൾ ഒന്ന് ഞെട്ടിപ്പോയി. തൊട്ടുപിന്നാലെ 9 സ്കിൻ ഉത്പന്നങ്ങൾക്കെതിരെ വലിയ വിമർശനങ്ങളാണ് ഉയരുന്നത്.
ഇതിനോടകം അഞ്ച് ഉത്പന്നങ്ങളാണ് 9 സ്കിൻ ലോഞ്ച് ചെയ്ത് വിൽപ്പന ആരംഭിച്ചത്. 50 ഗ്രാം അളവിലാണ് ഉത്പന്നങ്ങൾ നിർമ്മിച്ചിരിക്കുന്നത്. ഡേ ക്രീമിന് 1,799 രൂപ, നൈറ്റ് ക്രീമിന് 1,899 രൂപ, ആന്റി-ഏജിംഗ് സിറത്തിന് 1,499 രൂപ, ഗ്ലോ സിറത്തിന് 1,199 രൂപ എന്നിങ്ങനെയാണ് വില. വിലയറിഞ്ഞതോടെ ഞെട്ടിയ ആരാധകർ വിമർശനങ്ങളുമായി എത്തിയിരിക്കുകയാണ്. നയൻതാര സെലിബ്രിറ്റികളെ മുന്നിൽ കണ്ടാണ് 9 സ്കിൻ ആരംഭിച്ചതെന്നും സാധാരണക്കാരന് താങ്ങാൻ കഴിയുന്ന വിലയല്ലെന്നും ആരാധകർ പറയുന്നു. കൂടാതെ 9 സ്കിൻ പരിചയപ്പെടുത്തിയിരിക്കുന്ന പ്രമോഷൻ വീഡിയോകളിലെല്ലാം നയൻതാര അധികമായി മേക്കപ്പ് ഉപയോഗിച്ചിരിക്കുന്നു എന്നാണ് ആരാധകരുടെ വിമർശനം.
തങ്ങളുടെ ആറ് വർഷത്തെ പരിശ്രമഫലമാണ് 9 സ്കിൻ, എന്ന് പ്രമോഷൻ സമയത്തും പ്രൊഡക്ട് ലോഞ്ചിംഗ് സമയത്തും നയൻതാര പറഞ്ഞിരുന്നു. പ്രകൃതിദത്തമായ വസ്തുക്കളും ആധുനിക ശാസ്ത്രവും നാനോയുടെ പിന്തുണയുള്ള സമവാക്യങ്ങളും ഉപയോഗിച്ചാണ് തങ്ങളുടെ ഓരോ ഉത്പന്നങ്ങളും നിർമ്മിച്ചിരിക്കുന്നതെന്നും നയൻതാര പറഞ്ഞിരുന്നു.