ആദ്യ സൗര ദൗത്യം ആദിത്യ എൽ1 ശേഖരിക്കുന്ന വിവരങ്ങളും പഠനങ്ങളും രാജ്യത്തെ പൗരന്മാർക്ക് മുമ്പിൽ അവതരിപ്പിക്കുമെന്നറിയിച്ച് പ്രോജക്ട് ഡയറക്ടർ നിഗർ ഷാജി. ആദിത്യ എൽ1 ശേഖരിക്കുന്ന വിവരങ്ങൾ സൂര്യനെക്കുറിച്ചുള്ള കൂടുതൽ കാര്യങ്ങൾ മനസിലാക്കുന്നതിനും ബഹിരാകാശ കാലാവസ്ഥയിൽ എത്രമാത്രം സ്വാധീനിക്കുന്നുവെന്നും തിരിച്ചറിയാൻ സഹായിക്കും.
ആദ്യ ഘട്ടത്തിൽ ഐഎസ്ആർഒ ശാസ്ത്രജ്ഞർ മാത്രമാകും വിവരങ്ങൾ വിശകലനം ചെയ്യുക. ഇതിന് ശേഷമാകും ആഗോളതലത്തിലേക്ക് പങ്കുവെയ്ക്കുകയെന്ന് അദ്ദേഹം വ്യക്തമാക്കി.അതേസമയം ഈ കഴിഞ്ഞ ദിവസമാണ് പേടകം ഭൂമിയുടെ സ്വാധീന വലയം ഭേദിച്ച് ലഗ്രാഞ്ച് പോയിന്റിലേക്കുള്ള യാത്ര ആരംഭിക്കുന്നത്.
സെപ്റ്റംബർ രണ്ടിന് ശ്രീഹരിക്കോട്ടയിൽ നിന്നും വിക്ഷേപിച്ച പേടകം നിലവിൽ 9.2 ലക്ഷം കിലോമീറ്റർ പിന്നിട്ടു. ഭൂമിയിൽ നിന്നും 15 ലക്ഷം കിലോമീറ്റർ അകലെയായുള്ള ലഗ്രാഞ്ച് പോയിന്റ് ലക്ഷ്യം വെച്ചാണ് പേടകം നീങ്ങുന്നത്. ജനുവരി ആദ്യം പേടകം ലക്ഷ്യസ്ഥാനത്തെത്തുമെന്നാണ് പ്രതീക്ഷയെന്നും അദ്ദേഹം വ്യക്തമാക്കി.
