അനുദിനം ബഹിരാകാശത്ത് നിന്നുമുള്ള അതിശയകരമായ വിവിധ ദൃശ്യങ്ങളാണ് ഭൂമിയിലേക്ക് എത്തുന്നത്. അവ ഓരോന്നും വളരെയധികം കൗതുകം ഉണർത്തുന്നവയാണ്. ഇപ്പോഴിതാ അത്തരത്തിൽ ഒരു വീഡിയോ ആണ് സമൂഹമാദ്ധ്യമങ്ങൾ ശ്രദ്ധേയമാകുന്നത്. ബഹിരാകാശ യാത്രിക ഒരു ഫ്ളോട്ടിംഗ് സ്പേസ് കപ്പിലേക്ക് കാപ്പി ഒഴിക്കുമ്പോൾ എന്താണ് സംഭവിക്കുക എന്ന വീഡിയോ ആണ് ശ്രദ്ധേയമാകുന്നത്.
അന്താരാഷ്ട്ര ബഹിരാകാശ നിലയത്തിൽ ഒരു കപ്പ് കാപ്പി തയാറാക്കി ആസ്വദിക്കുന്ന ബഹിരാകാശ സഞ്ചാരിയുടെ ദൃശ്യം യൂറോപ്യൻ ബഹിരാകാശ ഏജൻസിയാണ് എക്സിലൂടെ പങ്കുവെച്ചത്. ബഹിരാകാശ സഞ്ചാരിയായ സാമന്ത ക്രിസ്റ്റോഫോറെറ്റി ഒരു കവറിൽ നിന്നും കോംപാക്റ്റ് കണ്ടെയ്നറിലേക്ക് കാപ്പി മാറ്റുന്നതോടെയാണ് വീഡിയോ ആരംഭിക്കുന്നത്. എന്നാൽ ഇതിൽ നിന്നും കാപ്പി കുടിക്കാൻ ശ്രമിക്കുമ്പോൾ ഇത് ഖര രൂപത്തിൽ ഇരിക്കുന്നത് കാണാം.
പിന്നാലെ പ്രത്യേകം രൂപകൽപ്പന ചെയ്തിരിക്കുന്ന ഒരു കപ്പിലേക്ക് കാപ്പി മാറ്റിയതിന് ശേഷം നിഷ്പ്രയാസം അത് കുടിക്കുന്നതും കാണാം. ഇത് സ്പേസ് കപ്പ് എന്നാണ് പറയപ്പെടുന്നത്. ബഹിരാകാശ യാത്രികർക്ക് ബഹിരാകാശത്ത് കാപ്പി കുടിക്കുന്നതിനായി സൃഷ്ടിച്ചിട്ടുള്ള മൈക്രോഗ്രാവിറ്റി കപ്പാണിത്. ഒക്ടോബർ ഒന്നിനാണ് ഇഎസ്എ വീഡിയോ പങ്കുവെയ്ക്കുന്നത്.