ന്യൂഡല്ഹി: ന്യൂസ്ക്ലിക്ക് സ്ഥാപകനും എഡിറ്റര് ഇന് ചീഫുമായ പ്രബീര് പുര്കയസ്തയെ നിയമവിരുദ്ധ പ്രവര്ത്തനങ്ങള് (യുഎപിഎ) പ്രകാരം ചുമത്തിയ കേസുമായി ബന്ധപ്പെട്ട് 7 ദിവസത്തെ പോലീസ് കസ്റ്റഡിയില് വിട്ടു. ബുധനാഴ്ച രാവിലെയാണ് ഇവരെ ജഡ്ജിയുടെ വസതിയില് ഹാജരാക്കിയത്. തുടര്ന്ന് പുര്ക്കയസ്തക്കൊപ്പം അറസ്സിലായ ന്യൂസ് ക്ലിക്ക് ന്യൂസ് പോര്ട്ടലിന്റെ ഹ്യൂമന് റിസോഴ്സ് മേധാവി അമിത് ചക്രവര്ത്തിയെയും പ്രത്യേക കോടതി പോലീസ് കസ്റ്റഡിയില് വിട്ടു.
ചൈന അനുകൂല പ്രചാരണത്തിന് പണം കൈപ്പറ്റിയ കേസില് ന്യൂസ് ക്ലിക്ക് ഓഫീസിലും ന്യൂസ് പോര്ട്ടലുമായി ബന്ധപ്പെട്ട 40 ഓളം മാദ്ധ്യമ
പ്രവര്ത്തകരുടെയും സാമൂഹിക പ്രവര്ത്തകരുടെയും വസതികളില് ഡല്ഹി പോലീസ് പരിശോധന നടത്തിയിരുന്നു. മണിക്കൂറോളോളം നീണ്ട റെയ്ഡിന് ശേഷമാണ് പുര്ക്കയസ്തയെയും ചക്രവര്ത്തിയെയും അറസ്റ്റ് ചെയ്തത്. പരിശോധനക്ക് പിന്നാലെ ഡല്ഹിയിലെ ന്യൂസ്ക്ലിക്ക് ഓഫീസ് പോലീസ് സീല് ചെയ്തിരുന്നു. 46 പേരെ ചോദ്യം ചെയ്യുകയും ലാപ്ടോപ്പ്, മൊബൈല് ഫോണ് ഉള്പ്പെടെയുള്ള ഉകരണങ്ങളും മറ്റ് രേഖകളും പരിശോധനക്കായി പോലീസ് കൊണ്ടുപോകുകയും ചെയ്തു. മുതിര്ന്ന മാദ്ധ്യമ പ്രവര്ത്തകരായ ഊര്മിലേഷ്, ഔനിന്ദ്യോ ചക്രവര്ത്തി, അഭിസര് ശര്മ, പരഞ്ജോയ് ഗുഹ താകുര്ത്ത, ചരിത്രകാരന് സൊഹൈല് ഹാഷ്മി, ആക്ഷേപഹാസ്യകാരനായ സഞ്ജയ് രജൗറ, സെന്റര് ഫോര് ടെക്നോളജി ആന്ഡ് ഡവലപ്മെന്റിലെ ഡി രഘുനന്ദന് എന്നിവരെ ചോദ്യം ചെയ്യലിന് ശേഷം വിട്ടയച്ചിരുന്നു.
അടുത്തിടെ ന്യൂയോര്ക്ക് ടൈംസ് റിപ്പോര്ട്ട് ചെയ്തത് ഇന്ത്യയില് ചൈനയ്ക്ക് അനുകൂലമായ പ്രചരണങ്ങള്ക്കായി യുഎസ് കോടീശ്വരനായ നെവില് റോയ് സിംഗാമില് നിന്ന് ന്യൂസ് ക്ലിക്ക് വെബ്സൈറ്റ് പണം കൈപ്പറ്റിയെന്നാണ്. ഇതേതുടര്ന്ന്, മാദ്ധ്യമ സ്ഥാപനം ഡല്ഹി പോലീസിന്റെയും എന്ഫോഴ്സ്മെന്റ് ഡയറക്ടറേറ്റിന്റെയും (ഇഡി) സാമ്പത്തിക കുറ്റകൃത്യ വിഭാഗത്തിന്റെയും (ഇഒഡബ്ല്യു) നിരീക്ഷണത്തിലായിരുന്നു. ഓഗസ്റ്റ് 17-ന്, കര്ശനമായ നിയമവിരുദ്ധ പ്രവര്ത്തനങ്ങള് (പ്രിവന്ഷന്) ആക്ട് (യുഎപിഎ), ഐപിസിയിലെ മറ്റ് വകുപ്പുകള്, സെക്ഷന് 153 എ (രണ്ട് ഗ്രൂപ്പുകള്ക്കിടയില് ശത്രുത വളര്ത്തല്), 120 ബി (ക്രിമിനല് ഗൂഢാലോചന) എന്നിവ ഉള്പ്പെടുത്തി പോര്ട്ടലിനെതിരെ കേസെടുത്തിരുന്നു.
