കേരളത്തിൽ ടൂറിസം വളരണമെങ്കിൽ സ്വന്തമായി എയർലൈൻസ് തുടങ്ങണമെന്ന് നടൻ ഷൈൻ ടോം ചാക്കോ. മറ്റ് രാജ്യങ്ങളിൽ നിന്നും സംസ്ഥാനങ്ങളിൽ നിന്നും കേരളത്തിലേക്ക് വരുന്നതിനായി വിമാനങ്ങൾ കുറവാണ്. അതിനാൽ എന്തുകൊണ്ട് സംസ്ഥാനത്തിന് സ്വന്തമായി എയര്‍ലൈന്‍സ് തുടങ്ങിക്കൂടാ എന്നാണ് നടൻ ചോദിച്ചത്. എല്‍എഡിഎഫ് കണ്‍വീനർ ഇ.പി ജയരാജന്റെ സാന്നിധ്യത്തിലായിരുന്നു നടൻ ഇത്തരത്തിൽ ചോദ്യം ഉന്നയിച്ചത്. യുവ സംരംഭകര്‍ക്കുള്ള ബിസിനസ് കേരള മാഗസിന്‍ പുരസ്‌കാര വേദിയിലാണ് ഷൈന്‍ സംസാരിച്ചത്.
”ടൂറിസത്തിൽ ഏറ്റവും സാധ്യതയുള്ള സംസ്ഥാനമാണ് കേരളം. പക്ഷേ, ഇക്കാലത്ത് ടൂറിസ്റ്റുകൾ ആദ്യം ഫ്ലൈറ്റ് ആണ് നോക്കുന്നത്. ബെംഗളൂരുവില്‍നിന്നു ഫ്ലൈറ്റ് കേരളത്തിലേക്കില്ല. രാവിലെ ഒരു ഫ്ലൈറ്റ് ഉണ്ടാകും. ടിക്കറ്റിന് നാലായിരവും അയ്യായിരവും രൂപയാണ്. പിന്നെ ഉള്ളത് കണക്ഷന്‍ ഫ്‌ലൈറ്റുകളാണ്. അതിനൊക്കെ ഇരുപത്തിരണ്ടായിരവും ഇരുപത്തിഅയ്യായിരവും. ദുബായില്‍ നിന്നു പോലും രാവിലെ കേരളത്തിലേക്ക് വിമാനമില്ല. ടൂറിസം വിജയിക്കണമെങ്കില്‍, വളരണമെങ്കില്‍ ആ നാട്ടിലേക്ക് ഫ്ലൈറ്റുകളുടെ എണ്ണം കൂട്ടണം. എന്നാല്‍ പോലും ഏറ്റവും കൂടുതല്‍ സഞ്ചാരികളുള്ളത് കേരളത്തിലേക്കാണ്.
ഞാന്‍ യാത്ര ചെയ്യുന്നതു കൊണ്ടാണ് പറയുന്നത്. ഹൈദരാബാദിലും മുംബൈയിലും ചെന്നൈയിലും ഒക്കെ പോകുമ്പോള്‍, കേരളത്തിലേക്ക് വരാനും പോകാനും വിമാനങ്ങള്‍ കുറവാണ്. എന്തുകൊണ്ട് നമ്മുടെ സംസ്ഥാനത്തിന് എയര്‍ലൈന്‍സ് തുടങ്ങിക്കൂടാ. അത് വളരെയധികം ഉപയോഗപ്രദമാകും.’- ഷൈന്‍ ടോം ചാക്കോ പറഞ്ഞു.
