ആലപ്പുഴ: പ്രിമീയർ ലീഗിലെ വമ്പന്മാരായ മാഞ്ചസ്റ്റർ സിറ്റി ഫോളോ ചെയ്യുന്നത് ഏട്ട് ഇന്ത്യക്കാരെ. ഇതിൽ ഇന്ത്യയുടെ സ്റ്റാർ ബാറ്റർ വിരാട് കോഹ്ലിയും മാവേലിക്കര സ്വദേശി എസ് ദേവ നാരായണനും ഉൾപ്പെടുന്നു. ക്ലബ്ബ് ഫോളോ ചെയ്യുന്ന ഏക മലയാളിയും 18 കാരനായ ദേവനാരായണനാണ്. എന്താണ് ക്ലബ്ബും ഈ മലയാളിയും തമ്മിലുളള ബന്ധം?
തടിയിൽ പെയിന്റിംഗ് കൊണ്ട് വിസ്മയം തീർക്കുന്ന കലാകാരനാണ് ദേവ നാരായണൻ. ഇത് സമൂഹമാദ്ധ്യമങ്ങളിൽ വൈറലായതോടെ ക്ലബ്ബ് ദേവനെ സമീപിക്കുകയയും കൂടുതൽ കലാസൃഷ്ടികൾ ആവശ്യപ്പെടകയുമായിരുന്നു. എർലിങ് ഹാലൻഡ്, ജൂലിയൻ അൽവാരസ്, റൂബെൻ ഡയസ് എന്നീ ക്ലബ് താരങ്ങളുടെയും മുൻ താരമായിരുന്ന റിയാദ് മഹ്റെസിന്റെയും രൂപങ്ങൾ തടിയിൽ ദേവ നാരായണൻ സൃഷ്ടിച്ചത് ലോകത്തിന്റെ ശ്രദ്ധ പിടിച്ചുപറ്റി. ഇതു കൂടാതെ 2023ൽ ക്ലബ് സ്വന്തമാക്കിയ മൂന്ന് കിരീടങ്ങളും ദേവ നാരായണന്റെ കരവിരുതിൽ തടിയിൽ ചിത്രങ്ങളായി. സമൂഹമാദ്ധ്യമങ്ങളിൽ തടിയിലെ ഈ കിരീടങ്ങളും വൈറലായി.
ഹയർ സെക്കൻഡറി വിദ്യാർത്ഥിയായിരിക്കെ, കോവിഡ് കാലത്തെ ബോറടി മാറ്റാനാണ് ദേവ നാരായണൻ പെയിന്റിംഗ് ചെയ്തു തുടങ്ങിയത്. മെല്ലെ കരാവിരുത് മരക്കഷണങ്ങളിലേക്ക് എത്തി. 17-25 സെ.മീ. നീളവും ഒരു സെ.മീ. വീതിയുമുള്ള തടിക്കഷണങ്ങളിലാണ് താരങ്ങളുടെ ചിത്രങ്ങൾ പിറന്നത്.
”കാൽപന്തുകളിയോട് ഏറെ താത്പര്യമുള്ള ഞാൻ പെലെ, മറഡോണ, റൊണാൾഡോ, മെസ്സി എന്നിവരുടെ വുഡ് ആർട്ടിന്റെ ചിത്രങ്ങൾ 2022 ഓഗസ്റ്റ് 18ന് എന്റെ ഇൻസ്റ്റാഗ്രാം പേജിൽ പങ്കുവെച്ചു. ഇത് 1.55 ലക്ഷം പേർ കണ്ടു. ഈ വർഷം മാർച്ചിൽ, ലോകത്തിലെ ഏറ്റവും വലിയ ഓൺലൈൻ ഫുട്ബോൾ ആരാധകരുടെ കൂട്ടായ്മയായ ‘433’ എന്റെ പോസ്റ്റ് ഷെയർ ചെയ്യുകയും 19.4 ദശലക്ഷം കാഴ്ചക്കാരെ നേടുകയും ചെയ്തു,” ദേശീയ മാദ്ധ്യമത്തോട് ദേവ നാരായണൻ വ്യക്തമാക്കി. ഈ ചിത്രങ്ങൾ വൈറലായതോടെ ഇത് മാഞ്ചസ്റ്റർ സിറ്റി എഫ്സിയുടെ ശ്രദ്ധയിൽ പെടുകയായിരുന്നു.
”മാഞ്ചസ്റ്റർ സിറ്റിയുടെ സോഷ്യൽ മീഡിയ പേജുകളുടെ അഡ്മിനായ ജോനാഥൻ ടൗൺസ്ലിയുമായി ബന്ധപ്പെടാൻ ആവശ്യപ്പെട്ട് ക്ലബ്ബിൽ നിന്നുള്ള ഒരാൾ എനിക്ക് ഒരു സന്ദേശം അയച്ചു. ബന്ധപ്പെട്ടപ്പോൾ, ഹാലൻഡ്, അൽവാരസ്, മഹ്രെസ്, ഡയസ് എന്നിവരുടെ ഛായാചിത്രങ്ങൾ മരത്തിൽ സൃഷ്ടിക്കാൻ അദ്ദേഹം ആവശ്യപ്പെട്ടു. പിന്നീട് പ്രധാനപ്പെട്ട മൂന്ന് കിരീടങ്ങളായ എഫ് എ കപ്പ്, ഇംഗ്ലീഷ് പ്രീമിയർ ലീഗ്, യുവേഫ കപ്പ് ട്രോഫികൾ തടിയിൽ ചിത്രങ്ങളാക്കി തരാൻ ക്ലബ്ബ് ആവശ്യപ്പെടുകയായിരുന്നു. ”ദേവ പറഞ്ഞു.
”ഒരു ജേഴ്സി അയച്ചുതരുമോ എന്ന് ഞാൻ അദ്ദേഹത്തോട് ചോദിച്ചു. അദ്ദേഹം അതുപോലെ ചെയ്തു”- ഹാലൻഡ് ഒപ്പിട്ട ജേഴ്സിയാണ് സമ്മാനമായി ക്ലബ് അധികൃതർ ദേവ നാരായണന് അയച്ചുകൊടുത്തത്.
