തിരുവനന്തപുരം: സ്വന്തം വകുപ്പിൽ ഡിവൈഎഫ്‌ഐ നേതാവിന് അനധികൃത നിയമനം നൽകാൻ ഇടപെട്ട് മന്ത്രി വി. ശിവൻകുട്ടി. തിരുവനന്തപുരത്തെ കിലെയിൽ പബ്ലിസിറ്റി അസിസ്റ്റാന്റായി ഡിവൈഎഫ്‌ഐ നേതാവ് സൂര്യ ഹേമനെ നിയമിക്കാനാണ് തൊഴിൽ മന്ത്രി കൂടിയായ വി. ശിവൻകുട്ടി നിരന്തര ഇടപെടൽ നടത്തിയത്. ഇത് സംബന്ധിച്ച വിവരങ്ങൾ പുറത്തുവന്നിട്ടുണ്ട്.
2021 ജനുവരി നാലിനാണ് സൂര്യ ഹേമൻ ദിവസ വേതനക്കാരിയായി തിരുവനന്തപുരത്തെ കിലെയിൽ എത്തിയത്. ഒരു വർഷം പൂർത്തിയാകുമ്പോൾ കരാർ നിയമിതയായി. രണ്ടര മാസം കഴിഞ്ഞ് നിയമനം സാധൂകരിക്കണമെന്നാവശ്യപ്പെട്ട് കിലെയുടെ എക്‌സിക്യൂട്ടീവ് ഡയറക്ടർ തൊഴിൽവകുപ്പിന് കത്ത് നൽകി. സർക്കാരിന്റെ മുൻകൂർ അനുവാദമില്ലാതെയുള്ള നടപടി അംഗീകരിക്കാനാവില്ലെന്ന് വകുപ്പ് വിശദീകരണം നൽകി. എന്നാൽ മന്ത്രിയുടെ ഇടപെടലിൽ അപേക്ഷ ധനവകുപ്പിലേക്ക് എത്തുകയായിരുന്നു.
ജൂലൈ ഏഴിന് നടപടി സാധൂകരിക്കാൻ കഴിയില്ലെന്നും സൂര്യ ഹേമനെ പിരിച്ചുവിടണമെന്നും ധനവകുപ്പ് മറുപടി നൽകി. എംപ്ലോയ്‌മെന്റ് എക്‌സ്‌ചേഞ്ച് വഴി നിയമിക്കണമെന്ന ചട്ടം നിലനിൽക്കേയാണ് വേണ്ടപ്പെട്ടവരെ നിയമിച്ചത്. ഇനി ഇത് മറികടക്കരുതെന്ന നിർദേശത്തോടെ ധനവകുപ്പ് സൂര്യഹേമന്റെ നിയമനം സാധൂകരിക്കുകയായിരുന്നു. 29,535 രൂപ പ്രതിഫല നിരക്കിൽ പബ്ലിസിറ്റി അസിസ്റ്റന്റായി നിയമിച്ചു. എന്നാൽ നിയമനം സ്ഥിരമല്ലെന്നും കരാർ അടിസ്ഥാനത്തിൽ മാത്രമാണെന്നുമാണ് കിലെ ചെയർമാന്റെ വിശദീകരണം.
