കൊല്ലം: സർക്കാരിന്റെ പ്രവർത്തനങ്ങളെ കുറിച്ച് എത്രയൊക്കെ പുകഴ്ത്തി പറഞ്ഞിട്ടും അനക്കമില്ലാതിരുന്ന സദസിനെതിരെ മന്ത്രി വി.ശിവൻകുട്ടി. നല്ല കാര്യങ്ങൾ ചെയ്തത് പറഞ്ഞിട്ടും അങ്ങോട്ട് പറഞ്ഞ് കയ്യടി വാങ്ങേണ്ട സ്ഥിതിയാണെന്ന് ശിവൻകുട്ടി പറഞ്ഞു. കൊല്ലം കൊട്ടാരക്കയിൽ പുതിയ വിദ്യാഭ്യാസ സമുച്ചയത്തിന്റെ ഉദ്ഘാടനം ചെയ്യുന്ന ചടങ്ങിലായിരുന്നു സംഭവം. സ്വന്തം വകുപ്പിന്റെ നേട്ടങ്ങളെ കുറിച്ചാണ് ശിവൻകുട്ടി അക്കമിട്ട് എണ്ണിപ്പറഞ്ഞത്. എന്നാൽ കയ്യടിയൊന്നുമില്ലാതെ തണുത്ത പ്രതികരണമാണ് സദസിൽ നിന്ന് കിട്ടിയത്. എല്ലാവരും ആട്ടുകല്ലിൽ കാറ്റുപിടിച്ചപോലെ ഇരിക്കുകയാണെന്നാണ് മന്ത്രി ഇതിനെ വിശേഷിപ്പിച്ചത്.
‘എല്ലാവരും ആട്ടുകല്ലിൽ കാറ്റു പിടിച്ച പോലെയാണ് ഇരിക്കുന്നത്. ആട്ടുകല്ലിൽ കാറ്റടിച്ചാൽ അനങ്ങില്ലല്ലോ. നല്ല കാര്യങ്ങൾ പറഞ്ഞിട്ടും ഒരു പ്രതികരണവും കാണുന്നില്ല. ഇങ്ങനെയാണോ നമ്മുടെ നാട്? എല്ലാവരും നല്ലതു പോലെ ഒന്ന് കയ്യടിച്ച് പ്രോത്സാഹിപ്പിച്ചേ. ആരെങ്കിലും എന്തെങ്കിലും നല്ല കാര്യം ചെയ്താൽ അത് അങ്ങോട്ട് പറഞ്ഞ് കയ്യടി വാങ്ങണ്ട അവസ്ഥയാണ്.
ഇത് പുതിയ രീതിയാണ്. ഒരിടത്ത് ഞാൻ എത്തിയപ്പോൾ അവതാരക പറഞ്ഞു മന്ത്രി വേദിയിലേക്ക് വരികയാണ് എല്ലാവരും നല്ലൊരു കയ്യടി കൊടുക്കണമെന്ന്. അങ്ങനെ പറഞ്ഞ് കയ്യടി കിട്ടണ്ട, അവർക്ക് സൗകര്യമുണ്ടെങ്കിൽ കയ്യടിക്കും എന്ന് ഞാൻ പറയുകയും ചെയ്തുവെന്ന്” ശിവൻകുട്ടി പറഞ്ഞു. പിന്നാലെ മന്ത്രിയുടെ വാക്കുകൾക്ക് സദസിൽ നിന്ന് വലിയ കയ്യടി കിട്ടുകയും ചെയ്തു.
