ഓഫ് റോഡ് റൈഡുകൾക്കും ലോംഗ് ഡ്രൈവുകൾക്കും ബൈക്ക് ഉപയോഗിക്കുന്നവരാണ് ഇന്ത്യയിലെ യാത്രാ പ്രേമികൾ. അവരുടെ നീണ്ടകാലത്തെ കാത്തിരിപ്പിന് വിരാമം കുറിച്ച് കൊണ്ട് റോയൽ എൻ ഫീൽഡ് അവതരിപ്പിക്കുന്ന പുതിയ മോഡലായ ഹിമാലയൻ 452 വിന്റെ ഏറ്റവും പുതിയ ചിത്രം നിർമ്മാതാക്കൾ പുറത്തുവിട്ടു.
നിലവിലെ മോഡലായ ഹിമാലയൻ 411 ൽ നിന്നും അടിമുടി മാറ്റങ്ങളോടെയാണ് ഹിമാലയൻ 452 അവതരിപ്പിച്ചിരിക്കുന്നത്. പുതിയ മോഡൽ അടുത്ത മാസത്തോടെ വിപണിയിലെത്തുമെന്നാണ് സൂചന. വാഹനത്തിന്റെ ഫീച്ചറുകളിൽ വരുത്തിയിട്ടുള്ള മാറ്റം, വില, എന്നിവയും അടുത്ത മാസത്തോടെ പുറത്ത് വിടും.
നിലവിലെ മോഡലുകളിൽ വീൽബേസ് 1465 എം.എം ആണ് 452 മോഡലിൽ അത് 1510 ആയി ഉയർത്തിയിട്ടുണ്ട്. അതുപോലെ തന്നെ നീളം 2190 എം.എമ്മിൽ നിന്നും 2245 എം.എം ആക്കി മാറ്റിയിട്ടുണ്ട്. എൽ.ഇ.ഡിയിൽ ഒരുക്കിയിട്ടുള്ള റൗണ്ട് ഹെഡ്ലാമ്പ്, പരതിയ ഡിസൈനിലെ ടാങ്ക്, എൻജിൽ ഗാർഡ്, ലഗോജ് റാക്ക്, വൈഡ് ഹാൻഡിൽ ബാർ എന്നിവ ബൈക്കിനെ കൂടുതൽ മിഴിവുറ്റതാക്കുന്നു. കൂടാതെ 451.65 സി.സി ലിക്വിഡ് കൂൾഡ് സിംഗിൾ സിലിണ്ടർ എൻജിനാണ് ഹിമാലയൻ 452 ന്റെ മറ്റൊരു ആകർഷണം. കണക്ടിവിറ്റി സംവിധാനങ്ങൾ ഉൾപ്പെടെയുളള പുതിയ പല ഫീച്ചറുകളും ഈ മോഡലിൽ ഉണ്ടാകുമെന്നാണ് പ്രതീക്ഷ. ഏറ്റവും മികച്ച സുരക്ഷാ യാത്ര ഉറപ്പാക്കുന്നതിന് യു.എസ്.ഡി ഫോർക്കും മുന്നിലും പിന്നിലും ഡിസ്ക് ബ്രേക്കിനൊപ്പം ഡ്യുവൽ ചാനൽ എ.ബി.എസും വാഹനത്തിൽ നൽകും.