തിരുവനന്തപുരം: ബിജെപി സംസ്ഥാന ഉപാദ്ധ്യക്ഷ പ്രൊഫ വി.ടി. രമയുടെ ആദ്യ കവിതാ സമാഹാരം ‘ഉയിരാണി’ പ്രകാശനം ചെയ്തു. ബംഗാൾ ഗവർണർ ഡോ. സി.വി. ആനന്ദബോസ് മുതിർന്ന ആർഎസ്എസ് പ്രചാരകൻ എസ്. സേതുമാധവന് കൈമാറിയാണ് പുസ്തക പ്രകാശനം നിർവഹിച്ചത്. തിരുവനന്തപുരം പ്രസ് ക്ലബ് ടിഎൻജി ഹാളിൽ നടന്ന പരിപാടിയിൽ പ്രൊഫ തങ്കമണി അദ്ധ്യക്ഷയായി.
ഒരു കവിയെ ആർക്കും ലക്ഷ്മണ രേഖകൾക്കുള്ളിൽ ഒതുക്കി നിർത്താനാകില്ലെന്നും ഒരു കവി ജനിക്കുക എന്നത് ഒരു നക്ഷത്രം ജനിക്കുന്ന പോലെയാണെന്നും പുസ്തകം പ്രകാശനം ചെയ്തു കൊണ്ട് ഡോ. സി.വി. ആനന്ദബോസ് പറഞ്ഞു.
സ്വന്തം കുടുംബ കാര്യങ്ങളോടൊപ്പം സമാജ കാര്യത്തിനും സജീവമായി പ്രവർത്തിക്കുന്ന വിടി രമയുടെ പുസ്തകം അത്രയും പ്രാധാന്യമർഹിക്കുന്നതായും പുസ്തകം ഏറ്റുവാങ്ങിയ ശേഷം മുതിർന്ന ആർഎസ്എസ് പ്രചാരകൻ എസ്. സേതുമാധവൻ അഭിപ്രായപ്പെട്ടു.
വേദ പബ്ലിക്കേഷൻസ് പ്രസിദ്ധീകരിച്ച ഉയിരാണി 19 കവിതകളുടെ സമാഹാരമാണ്. പുസ്തക പരിചയത്തിന് ശേഷം പ്രൊഫ വി.ടി. രമ മറുപടി പ്രസംഗം നടത്തി. ബിജെപി സംസ്ഥാന സമിതിയംഗം സന്ദീപ് വചസ്പതി, ഡോ ലക്ഷ്മി വിജയൻ, ഹരി എസ് കർത്ത തുടങ്ങിയവർ ചടങ്ങിൽ പങ്കെടുത്തു.