ഇന്ത്യയിലെ തന്നെ മികച്ച വാഹന നിർമ്മാതാക്കളായ മഹീന്ദ്ര സബ്- 4 മീറ്റർ എസ്യുവി സെഗ്മെന്റിൽ തങ്ങളുടെ സ്ഥാനം ഉറപ്പിക്കാൻ ഒരുങ്ങുന്നു. പുതിയ അപ്ഡേഷനുകളോടും മാറ്റങ്ങളോടും കൂടിയാണ് 2024-ൽ മഹീന്ദ്രയുടെ എക്സ്യുവി300- ന്റെ പുതിയ പതിപ്പ് അവതരിപ്പിക്കാൻ ഒരുങ്ങുകയാണ്. അഡ്വാൻസ്ഡ് ഡ്രൈവർ അസിസ്റ്റൻസ് സിസ്റ്റംസ് (ADAS) ഉൾപ്പെടുത്തിയായിരിക്കും എക്സ്യുവി300 വിപണിയിൽ എത്തുക എന്നാണ് പുറത്ത് വരുന്ന റിപ്പോർട്ടുകൾ.
ആപ്പിൾ കാർപ്ലേ, ആൻഡ്രോയിഡ് ഓട്ടോ എന്നിവ സപ്പോർട്ട് ചെയ്യുന്ന വലിയ ഫ്രീ-സ്റ്റാൻഡിംഗ് ടച്ച്സ്ക്രീൻ ഇൻഫോടെയ്ൻമെന്റ് സിസ്റ്റം, ഓട്ടോമാറ്റിക് ട്രാൻസ്മിഷനുകൾക്കായുള്ള അപ്ഡേഷൻ ചെയ്തതും ചെറുതുമായ ഗിയർ സെലക്ടർ, സെൻട്രൽ എസി വെന്റുകൾ എന്നിവ ഉൾപ്പെടുന്ന എക്സ്യുവി 300 ൽ മൊത്തത്തിലുള്ള ഡാഷ്ബോർഡ് ഡിസൈൻ സ്ഥിരത പുലർത്തുന്നുണ്ടെങ്കിലും, പുതിയ ഫിനിഷുകൾ കൂടി ഉൾപ്പെടുത്തുന്നുണ്ട്. ഡിജിറ്റൽ ഡ്രൈവർ ഡിസ്പ്ലേ, വയർലെസ് ഫോൺ ചാർജർ, വെന്റിലേറ്റഡ് ഫ്രണ്ട് സീറ്റുകൾ തുടങ്ങിയ ആധുനിക സൗകര്യങ്ങളോടെ എസ്യുവി എത്തുമെന്നാണ് പ്രതീക്ഷ. മഹീന്ദ്ര എക്സ്യുവി 700 മഹീന്ദ്ര ബിഇ ഇലക്ട്രിക് എസ്യുവി എന്നിവയിൽ നിന്നും പ്രചോദനം ഉൾകൊണ്ടാണ് പുതിയ എക്സ്യുവി 300-ന്റെ ഡിസൈനും സ്റ്റൈലിംഗും.
എക്സ്യുവി700 ന് സമാനമായ സി-ആകൃതിയിലുള്ള എൽഇഡി ഹെഡ്ലാമ്പുകൾ, രണ്ട് ഭാഗങ്ങളുള്ള ഫ്രണ്ട് ഗ്രിൽ, പുതിയ രൂപത്തിനായി വലിയ സെൻട്രൽ എയർ ഇൻടേക്ക് എന്നിവ ഇതിലുണ്ടാകും. പുതുതായി രൂപകൽപന ചെയ്ത അലോയ് വീലുകൾക്ക് പുറമെ, പിൻഭാഗത്ത്, കോംപാക്റ്റ് എസ്യുവി പുനർരൂപകൽപ്പന ചെയ്ത ടെയിൽഗേറ്റ്, പുനർനിർമ്മിച്ച ലൈസൻസ് പ്ലേറ്റുള്ള പുതുക്കിയ റിയർ ബമ്പർ, പുതിയ ടെയിൽലാമ്പ് ക്ലസ്റ്ററുകൾ എന്നിവ നൽകും. നിലവിലുള്ള AMT ഗിയർബോക്സിന് പകരം ഒരു ടോർക്ക് കൺവെർട്ടർ ഓട്ടോമാറ്റിക് യൂണിറ്റ് ഉപയോഗിച്ച് ട്രാൻസ്മിഷൻ ഓപ്ഷനുകളിൽ മാറ്റമുണ്ടായേക്കാം. 2024 ലെ പുതിയ മഹീന്ദ്ര എക്സ്യുവി 300 1.2 ലിറ്റർ, 3-സിലിണ്ടർ ടർബോ പെട്രോൾ എഞ്ചിനും രണ്ട് പവർ ഔട്ട്പുട്ടുകളും 1.5 ലിറ്റർ ഡീസൽ എഞ്ചിനും വാഗ്ദാനം ചെയ്യുന്നുണ്ട്.