പാകിസ്താന് അതേനാണത്തിൽ മറുപടിയുമായി ഇന്ത്യൻ ബൗളർ ജസ്പ്രീത് ബുമ്ര. 2003-ൽ നടന്ന ഇന്ത്യ-പാക് മത്സരത്തിൽ സച്ചിനെ പുറത്താക്കിയതിന് ശേഷം ഷൊയ്ബ് അക്തർ തന്റെ പ്രസിദ്ധമായ വിംഗ്സ് ആഘോഷം നടത്തിയിരുന്നു. ഇന്ത്യ പാക് മത്സരത്തിന് മുമ്പ് ഇന്ത്യൻ ഇതിഹാസം സച്ചിൻ തെണ്ടുൽക്കറെ പുറത്താക്കുന്ന ചിത്രം ഷൊയ്ബ് സമൂഹമാദ്ധ്യമങ്ങളിൽ പങ്കുവച്ചിരുന്നു. ഇതിന് മറുപടി നൽകുകയാണ് ബുമ്ര. പാകിസ്താൻ ഇന്നിംഗ്സിൽ ഷദാബ് ഖാന്റെ വിക്കറ്റ് വീഴ്്ത്തിയതിന് പിന്നാലെ അക്തറിന്റെ അതേ ആക്ഷനിലൂടെ താരം മധുര പ്രതികാരം വീട്ടുകയായിരുന്നു. ഐക്കോണിക് വിംഗ്സ് ആക്ഷനിലൂടെ വിക്കറ്റ് നേട്ടം ആഘോഷിക്കുന്ന ബുമ്ര ക്യാമറകണ്ണുകളിൽ നിറയുകയായിരുന്നു.
എന്നാൽ 2003-ലെ ലോകകപ്പിൽ സച്ചിനും കഴിഞ്ഞ ലോകകപ്പിൽ വിരാട് കോലിയുമെല്ലാം പാക് ബൗളർമാരെ തല്ലിപ്പറത്തുന്ന ചിത്രം പങ്കുവെച്ചാണ് ഇന്ത്യൻ ആരാധകർ ഇതിന് മറുപടി നൽകുന്നത്. തനിക്കുള്ള മറുപടിയും വിംഗ്സ് ആക്ഷനാണെന്ന് അക്തറിനോട് പറയാതെ പറഞ്ഞിരിക്കുകയാണ് ബുമ്രയും.
അതേസമയം, ലോകകപ്പിൽ ഇന്ത്യക്കെതിരായ മത്സരത്തിൽ പാകിസ്താൻ ബാറ്റർമാരുടെ മോശം പ്രകടനത്തിൽ നിരാശ രേഖപ്പെടുത്തി ഷൊയ്ബ് അക്തർ. പാകിസ്താന്റെ മുൻനിര ബാറ്റർമാർക്ക് അവസരം മുതലെടുക്കാനായില്ല. അവരുടെ പ്രകടനം കണ്ട് നിരാശ തോന്നി. ഇന്ത്യൻ നായകൻ രോഹിത് ശർമ്മ അവസരത്തിനൊത്ത് മാറ്റങ്ങൾ വരുത്തി. ഇത്തരത്തിൽ അക്തർ ഇന്ത്യൻ ടീമിന്റെ നേട്ടങ്ങളെയും എണ്ണിപ്പറയുന്നുണ്ട് പോസ്റ്റിൽ. എക്സിലാണ് അക്തറിന്റെ വാക്കുകൾ. ഇന്ത്യക്കായി ജസ്പ്രീത് ബുമ്ര, മുഹമ്മദ് സിറാജ്, ഹാർദിക് പാണ്ഡ്യ, കുൽദീപ് യാദവ്, രവീദ്ര ജദേജ എന്നിവർ രണ്ടു വിക്കറ്റ് വീതം വീഴ്ത്തി.