ശ്രീനഗർ: ലോകത്തിന് ആവശ്യമുള്ളത് നൽകാൻ കഴിയുന്ന ഒരേയൊരു രാജ്യമാണ് ഭാരതമെന്ന് ആർഎസ്എസ് സർസംഘചാലക് മോഹൻ ഭാഗവത്. സന്തോഷവും സംതൃപ്തിയുമൊഴികെ ലോകത്തിന് എല്ലാമുണ്ടെന്നും അദ്ദേഹം കുറ്റപ്പെടുത്തി. ജമ്മുകശ്മീരിലെ കത്വയിൽ സംഘ പ്രവർത്തകരെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം.
ഇന്ന് ലോകത്തിന് ആവശ്യമായ കാര്യങ്ങൾ നൽകാൻ കഴിവുള്ള ലോകത്തിലെ ഏക രാജ്യമാണ് ഭാരതം. കാരണം ലോകത്തിന് മറ്റെല്ലാം ഉണ്ട്. എന്നാൽ സന്തോഷവും പരിഹാരവും സംതൃപ്തിയും നൽകുന്ന കാര്യങ്ങൾ ഒന്നും തന്നെയില്ല. ലോകത്തിലെ സംഘർഷങ്ങൾ അവസാനിപ്പിക്കുന്നതിനും സമാധാനം കൊണ്ടുവരുന്നതിനും കഴിഞ്ഞ 2,000 വർഷമായി എല്ലാ തരത്തിലും ശ്രമങ്ങൾ നടക്കുന്നു. എന്നിട്ടും ലോകത്തിന്റെ ദുരിതങ്ങൾ കുറയുന്നില്ല.
എല്ലാ മേഖലകളിലും ധാരാളം വികസനങ്ങളുണ്ടായി, സൗകര്യങ്ങൾ വർദ്ധിച്ചു, എന്നാൽ ലോകത്തിന്റെ കഷ്ടപ്പാടുകൾ കുറയുന്നില്ല. ആദ്യം യുക്രെയ്ൻ -റഷ്യ യുദ്ധം ആരംഭിച്ചു. ഇന്നിതാ ഇസ്രായേൽ-ഹമാസ് ഭീകര യുദ്ധമാണ് നടക്കുന്നത്. പ്രശ്‌നങ്ങൾ അവസാനിപ്പിക്കുന്നതിന് പകരം ലോകത്ത് സംഘർഷങ്ങൾ വർദ്ധിക്കുകയാണ് ചെയ്യുന്നതെന്നും മോഹൻ ഭാഗവത് പറഞ്ഞു.
