128 വര്ഷത്തിന് ശേഷമാണ് ക്രിക്കറ്റിനെ ഒളിമ്പിക്സില് ഉള്പ്പെടുത്താന് അന്താരാഷ്ട്ര ഒളിമ്പിക്സ് കമ്മിറ്റി തീരുമാനിക്കുന്നത്. കഴിഞ്ഞ ദിവസമാണ് മുംബൈയില് ചേര്ന്ന കമ്മിറ്റിയില് തീരുമാനം ഔദ്യോഗികമായി പ്രഖ്യാപിച്ചത്. 2028 ലോസ് ഏഞ്ചല്സ് ഗെയിംസിലാകും ക്രിക്കറ്റ് വീണ്ടും തിരികെയെത്തുക. ഇപ്പോള് ക്രിക്കറ്റിനെ വീണ്ടും ഒളിമ്പിക്സിലേക്ക് ഉള്പ്പെടുത്താന് ഉണ്ടായ പ്രധാന കാരണങ്ങളിലൊന്ന് കമ്മിറ്റി അംഗം തന്നെ തുറന്നു പറയുകയാണ്.
ഒളിമ്പിക്സില് ക്രിക്കറ്റ് ഉള്പ്പെടുത്താനുള്ള ഒരു പ്രധാന കാരണമായി മാറിയത് വിരാട് കോഹ്ലിയുടെ ജനപ്രീതിയാണെന്നാണ് കമ്മിറ്റി അംഗത്തിന്റെ വെളിപ്പെടുത്തല്. ഇറ്റലിയുടെ ഒളിമ്പിക് ചാമ്പ്യന് ഷൂട്ടറും ലോസ് എയ്ഞ്ചല്സ് 2028 ഒളിമ്പിക്സ് ഡയറക്ടറുമായ നിക്കോളോ കാംപ്രിയാനിയാണ് ഇക്കാര്യം പറഞ്ഞത്.
‘എന്റെ സുഹൃത്തായ വിരാട് കോഹ്ലിയാണ് ഇപ്പോള് ലോകത്തിലെ ഏറ്റവുമധികം ഫോളോവേഴ്സുള്ള അത്ലറ്റുകളില് മൂന്നാം സ്ഥാനത്ത്. സാമൂഹ്യ മാദ്ധ്യമങ്ങളില് അവന് 340 മില്യണ് ഫോളോവേഴ്സുണ്ട്. ടൈഗര് വുഡ്സ്,ലെബ്രോണ് ജെയിംസ്, ടോം ബ്രാഡി, എന്നിവരുടെ ആരാധകരെ ഒരുമിച്ചു കൂട്ടിയാലും വിരാട് കോഹ്ലിയുടെ ആരാധകര് അവര്ക്കുള്ളതിനേക്കാലും അധികമാണ്.’
‘ഇത്തരത്തില് ഒരു തീരുമാനം ലോസ് എയ്ഞ്ചല്സ് ഒളിമ്പിക്സിനെ സംബന്ധിച്ച് വലിയൊരു വിജയമാണ്. അന്താരാഷ്ട്ര ഒളിമ്പിക്സ് കമ്മിറ്റിയും ക്രിക്കറ്റ് ലോകവും വലിയ സന്തോഷത്തിലാണ്. കാരണം ഒളിമ്പിക്സില് ക്രിക്കറ്റ് ഉള്പ്പെടുത്തുന്നതിലൂടെ അതിനൊരു ആഗോള വേദിയാണ് രൂപീകരിക്കപ്പെടുന്നത്. പരമ്പരാഗതമായി ക്രിക്കറ്റുള്ള രാജ്യങ്ങള്ക്ക് ഉപരിയായി മറ്റിടങ്ങളിലേക്കും ക്രിക്കറ്റ് വ്യാപിക്കാനും ഇത് സഹായകരമാവും’ നിക്കോളോ കൂട്ടിച്ചേര്ത്തു.