മലയാളത്തിന്റെ നടന വിസ്മയമാണ് മോഹൻലാൽ. താരത്തിന്റെ സിനിമകൾ വരുമ്പോഴുള്ള അതേ ആവേശമാണ് ഒരു പുത്തൻ ഫോട്ടോ സമൂഹമാദ്ധ്യമങ്ങളിൽ വരുമ്പോഴുള്ളത്. മോഹൻലാലിന്റെ വളർത്തുമൃഗങ്ങൾ പോലും സമൂഹമാദ്ധ്യമത്തിലൂടെ അദ്ദേഹത്തിന്റെ ആരാധകർക്ക് സുപരിചിതരാണ്.
ഇപ്പോഴിതാ താരം വീട്ടിൽ വളർത്തുന്ന നായകളായ കാസ്പറിനും വിസ്കിക്കുമൊപ്പമുള്ള അദ്ദേഹത്തിന്റെ ചിത്രമാണ് സമൂഹമാദ്ധ്യമങ്ങളിൽ വൈറൽ ആകുന്നത്. മോഹൻലാൽ തന്നെയാണ് നായക്കുട്ടികൾക്കൊപ്പമുള്ള തന്റെ ചിത്രം സമൂഹമാദ്ധ്യമങ്ങളിലൂടെ പങ്കുവച്ചിരിക്കുന്നത്. എനിക്കൊപ്പം പോസ് ചെയ്യാൻ അവസാനം കാസ്പറിനെയും വിസ്കിയെയും സമ്മതിപ്പിച്ചു, എന്നാണ് ചിത്രത്തിനൊപ്പം മോഹൻലാൽ കുറിച്ചിരിക്കുന്നത്. താരത്തിന്റെ ഈ ചിത്രങ്ങൾ ആരാധകർ ഏറ്റെടുത്തു കഴിഞ്ഞു.
View this post on Instagram
അതേസമയം മലയാളത്തിന്റെ സൂപ്പർ സ്റ്റാർ മോഹൻലാലിന്റെ വമ്പൻ ചിത്രങ്ങളാണ് ഇനി വരാനിരിക്കുന്നത്. നിലവിൽ അഭിനയിച്ചുകൊണ്ടിരിക്കുന്നത് പാൻ ഇന്ത്യൻ ചിത്രം വൃഷഭയാണ്. 200 കോടി ബജറ്റിൽ ഒരുങ്ങുന്ന ചിത്രമാണിത്. ചിത്രത്തിന്റെ റിലീസ് തീയതി ദസറയ്ക്ക് പ്രഖ്യാപിക്കുമെന്നാണ് റിപ്പോർട്ടുകൾ. ഏവരും കാത്തിരിക്കുന്ന ലിജോ ജോസ് പെല്ലിശ്ശേരിയുടെ മലൈക്കോട്ടൈ വാലിബൻ, ജീത്തു ജോസഫിന്റെ നേര്, താരരാജാവ് മോഹൻലാലിന്റെ തന്നെ സംവിധാന അരങ്ങേറ്റമായ ബറോസ്, ജീത്തു ജോസഫിന്റെ റാം, ലൂസിഫറിന്റെ രണ്ടാം ഭാഗമായ, പൃഥ്വിരാജ് സംവിധാനം ചെയ്യുന്ന എമ്പുരാൻ എന്നിങ്ങനെയാണ് മോഹൻലാലിന്റെ മറ്റ് ചിത്രങ്ങൾ. ഇതിൽ മലൈക്കോട്ടൈ വാലിബനും നേരും ബറോസും ചിത്രീകരണം പൂർത്തിയാക്കിയ സിനിമകളാണ്. അതിനാൽ ഉടൻ തന്നെ ചിത്രം തീയറ്ററുകളിൽ എത്തുമെന്നാണ് പ്രേക്ഷകർ പ്രതീക്ഷിക്കുന്നത്.