റോയൽ എൻഫീൽഡ് അവതരിപ്പിക്കുന്ന പുത്തൻ മോഡൽ ഹിമാലയൻ 452ന്റെ കൂടുതൽ വിവരങ്ങൾ പുറത്ത് വിട്ട് നിർമ്മാതാക്കൾ. അടിമുടി മാറ്റങ്ങളോടെ എത്തുന്ന ഹിമാലയൻ 452 എന്നാണ് ഔദ്യോഗികമായി അറിയപ്പെടുന്നത്. പ്രീപ്രൊഡക്ഷൻ ബൈക്കിന്റെ പുത്തൻ ചിത്രങ്ങളും വീഡിയോയുമാണ് ഇപ്പോൾ പുറത്തിറങ്ങിയിട്ടുള്ളത്. എന്നാൽ കൂടുതൽ വിവരങ്ങളൊന്നും ഇതുവരെ കമ്പനി പുറത്ത് വിട്ടിട്ടില്ല. അടുത്ത മാസത്തോടെ വാഹനം വിപണിയിൽ അവതരിപ്പിക്കുമെന്നാണ് സൂചന.
പ്രശസ്ത നെതർലൻഡ്സ് യൂട്യൂബർ ‘ഇച്ചി ബൂട്ട്സ്’ പുറത്ത്വിട്ട ഏറ്റവും പുതിയ വീഡിയോ ഹിമാലയൻ 452 മായുള്ള ലേ ലഡാക്ക് യാത്രയാണ്. ഇതിനു മുമ്പും അവർ റോയൽ എൻഫീൽഡുമായി യാത്ര നടത്തിയിട്ടുണ്ട്.
1,510 എംഎം വീൽബേസോടെ എത്തുന്ന ഹിമാലയൻ 452 ന്റെ നീളം 2,245എംഎമ്മും വീതി 852 എംഎമ്മും ആണ്. 40.02 ബിഎച്ച്പിയാണ് എൻജിൻ കരുത്ത്. കൂടാതെ ആന്റി ലോക്ക് ബ്രേക്കിംഗ് സിസ്റ്റം, യുഎസ്ഡി മുൻഫോർക്കും, മോണോഷോക്ക് യൂണിറ്റും റൈഡ് ബൈ വയർ ടെക്നോളജിയും, ഓൾ എൽഇഡി സിസ്റ്റവും ഇതിൽ ഉൾപ്പെടുത്തും.
വാഹനത്തെ കുറിച്ചുള്ള കൂടുതൽ സങ്കേതിക വിവരങ്ങളും വില സംബന്ധിച്ച വിവരങ്ങളും അടുത്ത മാസത്തോടെ നിർമ്മാതാക്കൾ പുറത്ത് വിടുമെന്നാണ് പ്രതീക്ഷിക്കുന്നത്.