സാങ്കേതികവിദ്യയുടെ പുതുലോകം തേടി ഇറങ്ങിയ മനുഷ്യർക്ക് മുന്നിൽ നിരവധി വാതിലുകളാണ് തുറന്നിട്ടിരിക്കുന്നത്. അവിടെ നാം ഇന്നേവരെ കേൾക്കാത്തതും കാണാത്തതുമായ ഒട്ടനവധി കാര്യങ്ങളുമുണ്ട്. അതിലൊന്നാണ് ഐ-സിം. ഇ-സിം എന്നത് സുപരിചിതമായ ഒന്നാണ്. എന്നാൽ എന്താണ് ഐ-സിം? അറിയാം..
ഐ-സിം എന്നത് ഇ-സിമിന് സമാനമായ ഒന്നാണ്. എന്നാൽ ഇതിന് പ്രവർത്തിക്കാൻ അധിക ചിപ്പുകൾ ആവശ്യമില്ല എന്നതാണ് ഇതിന്റെ പ്രത്യേകത. ഭാവിയിലെ സ്നാപ്ഡ്രാഗൺ ചിപ്പുകളുള്ള സ്മാർട്ട്ഫോണുകളിൽ ഐ-സിം കൊണ്ടുവരുന്നതായി ക്വാൽകോം അടുത്തിടെ പ്രഖ്യാപിച്ചിരുന്നു. നിലവിൽ Snapdragon 8 Gen 2 SoC-ൽ മാത്രമേ ഇത് ലഭ്യമാകുകയുള്ളൂ.
പ്രയോജനങ്ങൾ
ഒരു ഐ-സിം നാനോ കാർഡിനെക്കാൾ 100 മടങ്ങ് ചെറുതാണെന്നാണ് ക്വാൽകോം അവകാശപ്പെടുന്നത്. ഇത് ഒരു സിം കാർഡ് സ്ലോട്ടിന്റെ ആവശ്യകത ഇല്ലാതാക്കുന്നു. ഫോണിനെ പൊടി, വെള്ളം എന്നിവയിൽ നിന്നും കൂടുതലായി സംരക്ഷിച്ച് മികച്ച പ്രവർത്തനക്ഷമത വാഗ്ദാനം ചെയ്യുന്നു.
നിലവിൽ ഐ-സിം പ്രദാനം ചെയ്യുന്ന ഫോണുകൾ ഇല്ലെങ്കിലും ഭാവിയിൽ സാംസംഗ് ഗാലക്സി ഉൾപ്പെടെയുള്ള ഫോണുകൾക്ക് ഐ-സിം സാങ്കേതികവിദ്യ ലഭ്യമാക്കുമെന്നാണ് ക്വോൽകോം പറയുന്നത്. 2030-ഓടെ ഐ-സിം എന്ന ലക്ഷ്യം കൈവരിക്കാനാകുമെന്നാണ് ക്വോൽകോം വിലയിരുത്തുന്നത്.