മുംബൈ: കൊട്ടക് മഹീന്ദ്ര ബാങ്കിന്റെ പുതിയ മാനേജിംഗ് ഡയറക്ടറായും ചീഫ് എക്സിക്യൂട്ടീവ് ഓഫീസറായും അശോക് വസ്വാനിയെ നിയമിക്കും. മുൻ എംഡിയും സിഇഒയുമായിരുന്ന ഉദയ് കൊട്ടക് രാജിവെച്ചതോടെയാണ് പുതിയ പ്രഖ്യാപനം.
‘അശോക് വസ്വാനിയെ ബാങ്കിന്റെ അടുത്ത എംഡി, സിഇഒ ആയി നിയമിക്കുന്നതിന് റിസർവ് ബാങ്ക് ഓഫ് ഇന്ത്യ അംഗീകാരം നൽകി. ചുമതലയേറ്റ തീയതി മുതൽ മൂന്ന് വർഷത്തേക്കാണ് ഇതിന്റെ കാലാവധി. 2024 ജനുവരി 1 ന് മുൻപ് തന്നെ അദ്ദേഹം ചുമതലയേൽക്കും,’ കൊട്ടക് ബാങ്ക് അറിയിച്ചു. 2021 മുതൽ പ്രാബല്യത്തിൽ വരുന്ന ആർബിഐ നിയമങ്ങൾ ഇപ്പോൾ ബാങ്ക് സിഇഒമാരുടെ പരമാവധി കാലാവധി 15 വർഷമായി പരിമിതപ്പെടുത്തിയിട്ടുണ്ട്.
കൊട്ടക് മഹീന്ദ്ര ബാങ്കിനെ നയിക്കാനുള്ള ഉത്തരവാദിത്തം നൽകിയതിന് ബോർഡിന് നന്ദി പറഞ്ഞ വസ്വാനി, ഒരു ‘ലോകോത്തര സ്ഥാപനം’ കെട്ടിപ്പടുത്ത ഉദയ് കൊട്ടക്കിന്റെ പാരമ്പര്യം മുന്നോട്ട് കൊണ്ടുപോകുന്നതിൽ ‘ആവേശവും ബഹുമാനവും’ ഉണ്ടെന്നും ഞങ്ങളുടെപ്രഗത്ഭരായ ടീമിനൊപ്പം ബാങ്കിനെ പുതിയ ഉയരങ്ങളിലേക്ക് കൊണ്ട് പോവുകയും അടുത്ത അഞ്ച് വർഷത്തിനുള്ളിൽ ലോകത്തിലെ ഏറ്റവും മികച്ച മൂന്ന് സമ്പദ്വ്യവസ്ഥകളിലൊന്നാകാനുള്ള ഇന്ത്യയുടെ യാത്രയിൽ കൊട്ടക്മഹീന്ദ്രാ ബാങ്ക് നിർണ്ണായക പങ്ക് വഹിക്കുമെന്നും അദ്ദേഹം പറഞ്ഞു.
നീണ്ട വർഷങ്ങളുടെ പരിചയ സമ്പത്തുള്ള വ്യക്തിയാണ് അശോക് വസ്വാനി. 2016 മുതൽ 2019 വരെ ബ്രിട്ടീഷ് ബാങ്ക് ബാർക്ലേസിന്റെ സിഇഒ ആയിരുന്നു അദ്ദേഹം പിന്നീട് 2019-2021 കാലയളവിൽ അവരുടെ തന്നെ ആഗോള ഉപഭോക്തൃ, പേയ്മെന്റ് ബിസിനസുകളുടെ സിഇഒ ആയി. ഇന്ത്യയിൽ ജനിച്ച വസ്വാനി മുംബൈയിലെ സിഡെൻഹാം കോളേജിൽ നിന്ന് സാമ്പത്തിക ശാസ്ത്രത്തിൽ കൊമേഴ്സ് ബിരുദവും സ്റ്റാൻഫോർഡ് യൂണിവേഴ്സിറ്റിയിൽ നിന്ന് എക്സിക്യൂട്ടീവ് വിദ്യാഭ്യാസവും നേടിയിട്ടുണ്ട്. അതോടൊപ്പം തന്നെ അദ്ദേഹം സിഎയും സിഎസും ചെയ്തിട്ടുണ്ട്.
ഈ വർഷം സെപ്തംബർ 2 നാണ് ഉദയ് കൊട്ടക് രാജി പ്രഖ്യാപനം നടത്തിയത്. ഡിസംബറിൽ വിരമിക്കാൻ ഇരിക്കെ അദ്ദേഹത്തിന്റെ പെട്ടെന്നുളള തീരുമാനം എല്ലാവരെയും അത്ഭുതപ്പെടുത്തിയിരുന്നു. ബാങ്കിന്റെ ജോയിന്റ് എംഡി ദീപക് ഗുപ്ത ഡിസംബർ വരെ എംഡിയും സിഇഒയും ആയി ചുമതലയേൽക്കുമെന്നാണ് ഉദയ് സ്ഥാനമൊഴിയുന്ന സമയത്ത് പറഞ്ഞിരുന്നത്. ബാങ്കിന്റെ ബോർഡിലെ മുഴുവൻ സമയ ഡയറക്ടർമാരായ കെവിഎസ് മണിയനും ശാന്തി ഏകാംബരവുമാണ് കൊട്ടക്കിന്റെ പിൻഗാമിയാകാൻ സാധ്യതയുണ്ടായിരുന്നവർ. എന്നാൽ ഇപ്പോൾ ബാങ്ക് മനേജ്മെന്റിൽ നിന്ന് ഒരാളെ തിരഞ്ഞെടുക്കുന്നതിനുപകരം, ആഗോള ബാങ്കിംഗ് അനുഭവമുള്ള ഒരാളെ നിയമിക്കാനാണ് കൊട്ടക് ബാങ്ക് തീരുമാനിച്ചിരിക്കുന്നത്.
