ടെഹ്റാൻ: ഹിജാബ് ധരിച്ചില്ലെന്ന കാരണത്താൽ ഇറാൻ ഭരണകൂടത്തിന്റെ പോലീസ് ക്രൂരമായി മർദ്ദിച്ചതിനെ തുടർന്ന് പെൺകുട്ടി മെട്രോ ട്രെയിനിൽ കുഴഞ്ഞു വീണു. അർമിത ഗൊരാവന്ദ് എന്ന 16-കാരിയാണ് മെട്രോയിൽ കുഴഞ്ഞു വീണത്. പെൺകുട്ടിയ്ക്ക് മസ്തിഷ്ക മരണം സംഭവിച്ചതായും ഡോക്ടർമാർ സ്ഥിരീകരിച്ചു.
ഹിജാബ് ധരിക്കാത്തതിനെ തുടർന്ന് അർമിത മതപോലീസിന്റെ ക്രൂര പീഡനങ്ങൾക്ക് വിധേയയായിട്ടുണ്ടായിരുന്നെന്നാണ് ദൃക്സാക്ഷികൾ പറയുന്നത്. ഈ മാസം ഒന്നിന് കൂട്ടുകാരികൾക്കൊപ്പം മെട്രോയിൽ യാത്ര ചെയ്യുന്നതിനിടയിൽ അർമിത കുഴഞ്ഞു വീഴുകയായിരുന്നു. ഉടൻ തന്നെ തൊട്ടടുത്തുള്ള ആശുപത്രിയിലെത്തിച്ചെങ്കിലും മസ്തിഷ്ക മരണം സംഭവിച്ചതായി സ്ഥിരീകരിച്ചു. ജീവൻരക്ഷാ ഉപകരണങ്ങളുടെ സഹായത്തോടെയാണ് അർമിത ആശുപത്രിയിലുള്ളതെന്ന് ഇറാൻ ഔദ്യോഗിക വാർത്താ ഏജൻസി അറിയിച്ചു.