യുഎസിൽ നിന്നും ദിനോസറിന്റെ ഫോസിലുകൾ മോഷ്ടിച്ച് ചൈനയ്ക്ക് വിറ്റ നാല് പേർ അറസ്റ്റിൽ. ഏകദേശം ഒരു ദശലക്ഷം ഡോളർ വിലമതിക്കുന്ന ഫോസിലുകളാണ് പ്രതികൾ ചൈനയിലേക്ക് കയറ്റുമതി ചെയ്തത്. സംഭവത്തിൽ അറസ്റ്റിലായ നാല് പേരും യുഎസ് പൗരന്മാരാണ്. ഒറിഗോൺ, ലോസ് ആഞ്ചലസ്, ഉറ്റ സ്വദേശികളാണ് പ്രതികൾ. ഇതിൽ രണ്ട് പേർ അച്ഛനും മകനുമാണ്. പാലിയന്റോളജിക്കൽ റിസോഴ്സസ് പ്രസർവേഷൻ ആക്ട് നിയമപ്രകാരം ഇവർക്കെതിരെ കേസെടുത്തതായി പോലീസ് അറിയിച്ചു.
തെക്കുകിഴക്കൻ യൂട്ടോയിൽ നിന്നാണ് ഇവർ ദിനോസർ അസ്ഥികൾ നിയമവിരുദ്ധമായി കടത്തിയത്. തുടർന്ന് ചൈനയിലേക്ക് കയറ്റുമതി ചെയ്യുകയായിരുന്നു. 10,00,000 ഡോളർ വിലമതിക്കുന്ന ദിനോസർ അസ്ഥികൾ വിറ്റഴിച്ചതിന് പുറമേ, 30,00,000 ഡോളറിലധികം തുകയുടെ നാശനഷ്ടങ്ങളാണ് ഫോസിലുകൾക്ക് മേൽ പ്രതികൾ ഉണ്ടാക്കിയിരിക്കുന്നത്. പല ഫോസിലുകളും ഉടഞ്ഞുപോവുകയും പല കഷ്ണങ്ങളായി മുറിക്കുകയും ചെയ്തിട്ടുണ്ട്. 2018 മാർച്ച് മുതൽ 2023 മാർച്ച് വരെയുള്ള കാലഘട്ടത്തിലാണ് ഇവർ തന്ത്രപരമായി ഫോസിലുകൾ കടത്തിയതെന്നും യുഎസിലെ പ്രത്യേക അന്വേഷണ സംഘം അറിയിച്ചു.
