ബംഗ്ലാദേശ് ക്യാപ്റ്റന്‍ ഷാക്കിബ് അല്‍ ഹസന്‍ ലോകകപ്പ് പാതിവഴിയില്‍ നില്‍ക്കെ നാട്ടിലേക്ക് മടങ്ങി. ടൂര്‍ണമെന്റിലെ ആദ്യ മത്സരത്തില്‍ ജയത്തോടെ തുടങ്ങിയ ബംഗ്ലാദേശിന് തുടര്‍ന്നുള്ള നാലു കളികളിലും കൂറ്റന്‍ തോല്‍വിയായിരുന്നു ഫലം. ഇതാണ് നായകനെ നാട്ടിലേക്ക് മടങ്ങാന്‍ പ്രേരിപ്പിച്ചത്. തന്റെ വ്യക്തിഗത ഉപദേശകനായ നസ്മുല്‍ ഫഹീനൊപ്പം പരിശീലനം നടത്താണ് താരം നാട്ടിലേക്ക് മടങ്ങിയത്.
കഴിഞ്ഞ ലോകകപ്പില്‍ ഇംഗ്ലണ്ടില്‍ നടത്തിയ പ്രകടനത്തിന്റെ നിഴല്‍പോലുമാകാന്‍ ഷാക്കിബിന് ആയിരുന്നില്ല. ഇതാണ് താരത്തെ കൂടുതല്‍ സമ്മര്‍ദ്ദത്തിലാക്കിയത്. കൊല്‍ക്കത്തയില്‍ നെതര്‍ലന്‍ഡിനെതിരെയും പാകിസ്താനെതിരെയുമാണ് ബംഗ്ളാദേശിന്റെ ശേഷിക്കുന്ന മത്സരങ്ങള്‍.ധാക്കയിലാണ് താരം പരിശീലനം നടത്തുന്നത്. ഡച്ചുകാര്‍ക്കെതിരെയുള്ള മത്സരത്തിന് മുന്‍പ് താരം മടങ്ങിയെത്തിയേക്കും.
ഇംഗ്ലണ്ടില്‍ നടന്ന ലോകകപ്പില്‍ 8 മല്‍സരങ്ങളില്‍ നിന്നും രണ്ട് സെഞ്ച്വറി അടക്കം 606 റണ്‍സ് നേടിയ ഷാക്കിബ് 11 വിക്കറ്റും നേടിയിരുന്നു. ഈ ലോകകപ്പില്‍ ഇതുവരെ 6 വിക്കറ്റ് നേടിയ ഷാക്കിബിന് 56 റണ്‍സ് നേടാനെ കഴിഞ്ഞുള്ളു.
