കാഠ്മണ്ഡു: നേപ്പാൾ ടീമിന് 20 ക്രിക്കറ്റ് കിറ്റുകൾ സമ്മാനിച്ച് ഇന്ത്യ. കാഠ്മണ്ഡുവിലെ ഇന്ത്യൻ എംബസിയിൽ നടന്ന ചടങ്ങിൽ അംബാസിഡർ നവീൻ ശ്രീവാസ്തവ താരങ്ങൾക്ക് കിറ്റുകൾ കൈമാറി. നേപ്പാൾ ക്രിക്കറ്റ് ബോർഡ് പ്രസിഡന്റ് ചതുർ ബി ചന്ദ്, സെക്രട്ടറി പരസ് ഖട്ക എന്നിവർ ചടങ്ങിൽ പങ്കെടുത്തു.
ഇന്ത്യയുടെ സമ്മാനത്തിന് നന്ദി പറഞ്ഞ ക്രിക്കറ്റ് ബോർഡ് സെക്രട്ടറി പരസ്, ക്രിക്കറ്റ് മേഖലയിലെ ഇരുരാജ്യങ്ങളുടെയും സഹകരണത്തിന്റെ തുടക്കമാകും ഇന്ത്യയുടെ ഈ ഉപഹാരം കൈമാറലെന്ന് അഭിപ്രായപ്പെട്ടു. ഇന്ത്യയുമായുള്ള സഹകരണം നേപ്പാളിനെ സംബന്ധിച്ച് അനിവാര്യമാണെന്നും അദ്ദേഹം കൂട്ടിച്ചേർത്തു.
എന്നാൽ നേപ്പാൾ ക്രിക്കറ്റ് ടീം നായകന്റെ ആവശ്യം മറ്റൊന്നായിരുന്നു. ഇന്ത്യൻ ദേശീയ ടീമിനൊപ്പം പരിശീലനം നേടാൻ അവസരം ഒരുക്കണമെന്ന് രോഹിത് പൗദൽ ആവശ്യപ്പെട്ടു. ഇതിനായി ബിസിസിഐയെ സമീപിക്കണമെന്നും നേപ്പാളിലെ ഇന്ത്യൻ എംബസി അതിൽ ഇടപെടണമെന്നും രോഹിത് അഭ്യർത്ഥിച്ചു.
നിലവിൽ ഏകദിന റാങ്കിംഗിൽ 15 -ാം സ്ഥാനത്താണ് നേപ്പാൾ. ടി20 റാങ്കിംഗിൽ 11-ാം സ്ഥാനത്തും. 2023 ഏഷ്യൻ ഗെയിംസിൽ മികച്ച പ്രകടനമാണ് ടീം പുറത്തെടുത്തത്.
