ന്യൂഡൽഹി: പ്രധാനമന്ത്രിയുടെ പ്രതിമാസ റേഡിയോ പരിപാടിയായ മൻ കി ബാത്തിന്റെ 106-ാം പതിപ്പ് ഇന്ന്. രാവിലെ 11 മണിക്കാണ് പ്രധാനമന്ത്രി ജനങ്ങളെ അഭിസംബോധന ചെയ്യുന്നത്.
ഭാരതീയ സംഗീതത്തെ സ്‌നേഹിക്കുന്ന കസാന്ദ്ര മേ എന്ന ജർമ്മൻ പെൺകുട്ടിയെയാണ് കഴിഞ്ഞ മാസം അദ്ദേഹം മൻ കി ബാത്തിലൂടെ പരിചയപ്പെടുത്തിയത്. മഹാവിഷ്ണുവിനെ സ്തുതിക്കുന്ന സംസ്‌കൃത ശ്ലോകവും, കന്നഡ ഗാനവുമാണ് കസാന്ദ്രയുടേതായി അദ്ദേഹം പങ്കുവെച്ചത്. കൂടാതെ ഭാരതീയ സംസ്‌കാരവും സംഗീതവും ഇപ്പോൾ ആഗോളമായി മാറിയിരിക്കുന്നു. ലോകമെമ്പാടുമുള്ള ആളുകളുടെ ആകർഷണം നാൾക്കുനാൾ വർദ്ധിച്ചു വരികയാണ്. കസാന്ദ്ര മേയുടെ ശ്രമങ്ങൾ ഓരോ ഇന്ത്യക്കാരനെയും ആകർഷിക്കുമെന്നും കഴിഞ്ഞ പതിപ്പിൽ മോദി പറഞ്ഞു.
ആകാശവാണിയുടെയും ദൂരദർശന്റെയും മുഴുവൻ നെറ്റ്വർക്കിലും ആകാശവാണി വെബ്സൈറ്റിലും ന്യൂസൺ എയർ മൊബൈൽ ആപ്പിലും മൻ കി ബാത്ത് സംപ്രേക്ഷണം ചെയ്യും. കൂടാതെ ആകാശവാണി, ഡിഡി ന്യൂസ്, പിഎംഒ, ഇൻഫർമേഷൻ ആൻഡ് ബ്രോഡ്കാസ്റ്റിംഗ് എന്നീ യൂട്യൂബ് ചാനലുകളിലും പരിപാടി സംപ്രേക്ഷണം ചെയ്യും.
