ശ്രീനഗർ: ജമ്മു കശ്മീരിൽ പോലീസ് ഉദ്യോഗസ്ഥന് നേരെ തീവ്രവാദി ആക്രമണം. ശ്രീനഗറിലെ ഈദ്ഗാഹ് പള്ളിക്ക് സമീപം ഭീകരർ നടത്തിയ വെടിവെപ്പിൽ ജമ്മു കശ്മീർ പോലീസിലെ ഇൻസ്‌പെക്ടർക്ക് ഗുരുതരമായി പരിക്കേറ്റു. ഉദ്യോഗസ്ഥനെ അടുത്തുള്ള ആശുപത്രിയിൽ പ്രവേശിപ്പിച്ചു. ഇൻസ്‌പെക്ടർ മസ്‌റൂർ അഹമ്മദിനാണ് വെടിയേറ്റത്.
നാട്ടുകാർക്കൊപ്പം ഗ്രൗണ്ടിൽ ക്രിക്കറ്റ് കളിക്കുന്നതിനിടെയാണ് തീവ്രവാദി ആക്രമണം ഉണ്ടായതെന്ന് കശ്മീർ സോൺ പോലീസ് ഉദ്യോഗസ്ഥർ പറഞ്ഞു. കുറ്റകൃത്യം നടത്താൻ ഭീകരർ ഉപയോഗിച്ചത് പിസ്റ്റളാണെന്നും പോലീസ് വ്യക്തമാക്കി. സംഭവത്തെ തുടർന്ന് പ്രദേശത്ത് നീരീക്ഷണം ശക്തമാക്കിയിരിക്കുകയാണ്.
ലഷ്‌കർ പിന്തുണയുള്ള ഭീകര സംഘടനയായ ദി റെസിസ്റ്റൻസ് ഫ്രണ്ട് (ടിആർഎഫ്) ആക്രമണത്തിന്റെ ഉത്തരവാദിത്വം ഏറ്റെടുത്തതായാണ് റിപ്പോർട്ടുകൾ. അക്രമികളെക്കുറിച്ചുള്ള കൂടുതൽ വിവരങ്ങൾ ലഭിക്കാൻ സിസിടിവി പരിശോധിച്ചു വരികയാണ്. ലഷ്ക്കർ ഭീകരരായ മോമിൻ, ബാസിത് ദാർ എന്നിവർ പ്രദേശത്ത് സജീവമാണെന്നും പോലീസ് പറഞ്ഞു. ഇവർക്കായുള്ള തിരച്ചിൽ ശക്തമാക്കി.
