ലോകത്തെ ഏറ്റവുമധികം പ്രിയമേറിയ ഇ-മെയിൽ സേവനമാണ് ജി-മെയിൽ. എല്ലാ ഗൂഗിൾ അക്കൗണ്ടിനും ഗൂഗിൾ സൗജന്യമായി 15 GB സ്റ്റോറേജ് സ്‌പേസ് നൽകുന്നു. Google Photos, Google Docs, Google Drive, Google Sheets എന്നിവയെല്ലാം ജി-മെയിൽ സേവനത്തിൽ ഉൾപ്പെടുന്നു. അതുകൊണ്ട് തന്നെ സ്‌പേസ് ശ്രദ്ധാപൂർവ്വം ഉപയോഗിക്കണമെന്ന് ചുരുക്കം.
പലപ്പോഴും ഇതൊന്നും ശ്രദ്ധിക്കാതെ സ്‌പേസ് നിറയുമ്പോൾ എന്ത് ചെയ്യണമെന്ന് പരക്കം പായുന്നവരാകും ഭൂരിഭാഗം പേരും. ചില ‘ടിപ്‌സ് ആന്റ് ട്രിക്‌സ്’ ഉപയോഗിച്ചാൽ ഈ പ്രശ്‌നത്തിന് പരിഹാരം കാണാവുന്നതാണ്. സ്റ്റോറേജ് ലഭിക്കുന്നതിനും സ്റ്റോറേജ് ഫുൾ ആയാൽ ക്ലിയർ ചെയ്യുന്നതിനും സഹായിക്കുന്ന ചില വഴികൾ ഇതാ…
1) പഴയതും അനാവശ്യവുമായ ഇ-മെയിലുകൾ നീക്കം ചെയ്യുക
ജിമെയിലിൽ സ്‌പേസ് ലഭ്യമാക്കുന്നതിനുള്ള പ്രഥമവും ലളിതവുമായ വഴിയാണ് ഇത്. ഇൻബോക്‌സിൽ നിന്നും ആവശ്യമില്ലാത്ത ഇമെയിലുകൾ ഡിലീറ്റ് ചെയ്യുക. ഡിലീറ്റ് ചെയ്താലും സെർച്ച് ബാറിൽ തീയതി, സ്വീകർത്താവിന്റെ പേരോ മറ്റോ ഉപയോഗിച്ച് ഇമെയിലുകൾ കണ്ടെത്താവുന്നതാണ്.
2) ഫിൽട്ടറുകൾ ഉപയോഗിക്കുക
ഇമെയിലുകൾ വ്യത്യസ്ത ഫോൾഡറിലേക്ക് സ്വയയമേ ക്രമീകരിക്കുന്നതിനായി ഫിൽട്ടറുകൾക്ക് കഴിയും. ഇമെയിലുകൾ കണ്ടെത്തുന്നതിനും നിയന്ത്രിക്കുന്നതിനും ഇത് സഹായിക്കും. സബ്ജക്ട് ലൈനിലെ കീ വേർഡുകളോ മറ്റോ കൊടുത്താൽ ഫിൽട്ടറുകൾ ലഭ്യമാകും.
3) അറ്റാച്ച്‌മെന്റുകൾ മിതമായി ഉപയോഗിക്കുക
അറ്റാച്ച്‌മെന്റുകൾ മെയിലിനൊപ്പം വെക്കുന്നത് സ്റ്റോറേജ് പെട്ടെന്ന് ഫുൾ ആകുന്നതിന് കാരണമാകും. അതുകൊണ്ട് കഴിവതും ഫയലുകൾ അറ്റാച്ച് ചെയ്യുന്നതിന് പകരം അവയുടെ ലിങ്ക് അറ്റാച്ച് ചെയ്യാൻ ശ്രമിക്കുക. ഉദാഹരണത്തിന് ഒരു വലിയ ഫയൽ അയയ്‌ക്കണമെങ്കിൽ അത് ഗൂഗിൾ ഡ്രൈവിലേക്ക് അപ്‌ലോഡ് ചെയ്യുക. തുടർന്ന് ഇമെയിലിൽ ഫയലിലേക്കുള്ള ലിങ്ക് പങ്കുവെക്കാവുന്നതാണ്.
4) സ്പാം, ട്രാഷ് ഫോൾഡറുകൾ ക്ലിയർ ചെയ്യുക
അനാവശ്യമായ ഇമെയിലുകൾ ശേഖരിക്കുന്ന സ്പാം, ട്രാഷ് ഫോൾഡറുകൾ നീക്കം ചെയ്യുന്നത് ജിമെയിലിന്റെ സ്‌പേസ് ലഭിക്കുന്നതിന് സഹായിക്കും. ഈ ഫോൾഡറുകൾ പതിവായി ശൂന്യമാക്കുന്നത് ഏറെ ഗുണം ചെയ്യും.
5) വലിയ ഫയലുകൾ സൂക്ഷിക്കുന്നതിനായി ക്ലൗഡ് സ്റ്റോറേജ് സേവനം ഉപയോഗിക്കുക
വലിയ ഫയലുകൾ സ്വീകരിക്കുകയോ അയയ്‌ക്കുകയോ ചെയ്താൽ ഗൂഗിൾ ഡ്രൈവ് അല്ലെങ്കിൽ ഡ്രോപ്പ്‌ബോക്‌സ് പോലുള്ള ക്ലൗഡ് സ്റ്റോറേജ് സേവനം ഉപയോഗിക്കുന്നത് ജിമെയിൽ അക്കൗണ്ടിൽ ഇടം നേടാൻ സഹായിക്കും.
6) അനാവശ്യ ന്യൂസ് ലെറ്ററുകളും ഇ-മെയിലുകളും അൺ സബ്‌സ്‌ക്രൈബ് ചെയ്യുക
അനാവശ്യമായ നിരവധി ഇമെയിലുകളാണ് പ്രതിദിനവും നമ്മുടെ ജിമെയിലിൽ എത്തുന്നത്. ഇവയോട് താത്പര്യമില്ലെങ്കിൽ ലിസ്റ്റിൽ നിന്നും അൺ സബ്‌സ്‌ക്രൈബ് ചെയ്യുക. ഇതും സ്റ്റേറേജ് നേടാൻ സഹായിക്കും.
